DBP’yî bi munasebetê “Hewteyê Vîndîbîyayeyan” eşkerayîyêka nuştekî daye û dîyar kerd ke heta ke edalet bêro ê do têkoşînê xo bidomnê.
Hetê ÎHD’yî ra serra 1995î ra heta ewro 17 û 31ê Gulane sey “Hewteyê Vîndîbîyayeyan” yeno vîrardene. Amancê nê hewldayîşî no yo ke rastîya kesanî ke Tirkîya û dinya de demê destbendkerdişî de ameyê vîndî kerdene, înan reyde rî bi rî ameyîşêk virazo û aqûbetê kesanê vîndîbîyayeyan bêro persayene, kiştoxê înan vernîya edaletî de bêrê muhakemekerdene.
Eşkerayîya DBP’yî wina ya:
“1995î ra nata her serre mabênê tarîxanê 17-31ê Gulane “Hewteyê Vîndîbîyayeyan” ke yeno vîrardene, bi amanco ke no hewte bikero rojevê şarî seba pratîkê vîndîkerdişî bi zorî ke nê erdan de xorîn bîyo, aqûbetê nê însananî ke bi zorî vîndî bîyê bêro eşkerakerdiş û sucdaranê nê sucanê însanîyetî bero vernîya hukmî.
Çi heyf ke rixmo ke 30 serrî vîyartê, na babete de qet averşîyayîşêko şenik zî nêbîyo. Nê mabênî de endamîya Tirkîya ya seba Yewîya Ewrûpa qebul bîya, îlan biyo ke Krîterê Sîyasî yê Kopenhagenî ameyê caardiş, îfade bîyo ke derheqê heqanê însanî û demokrasî de gamê muhîmî erzîyayê. Îfade bîyo ke huqûqê mîyanneteweyî bîyo huqûqo zereyîn û bi paketanê reformî demokratîkbîyayîş ameyo xurtkerdiş.
La rastîyî vatişanê resmîyan reyde yew nîyê. Rixmo ke hende serrî vîyartî zî ne aqûbetê vîndîyan vejîyayo meydan, ne tehqîqatêko tesîrdar ameyo kerdene, ne zî sucdarî vejîyayê vernîya edaletî. Na rewşe nîşan dana ke fehm û sîstemê huqûqî yê Tirkîya de vurîyayîşêko bingeyîn çin o.
Vîndîyî ke bîyî babeta gêrayîşê heqîqetî, tena meseleyê demo vîyarteyî nê, meseleyê ewroyî û meseleyê wîcdanî yê ameyoxê ma yê. Coka ma do vengê xo berz bikerê û waştişê “aqûbetê vîndîbîyayanê bi zorî eşkere kerdiş û vejîyayîşê vernîya edaletî yê sucadaran” ke gama tewr bingeyîn a seba hesabdayîşê demê vîyarteyî û tesîsê aştîya komelkî yo, ma do hîna zêde îfade bikerê.
Heta ke edalet bêro ma do têkoşînê xo bidomnê.”
