Hemsereka DBP’î Çîgdem Kiliçgun Uçare vera awanîya DBP’î ya Amed de qisey kerd û va: “Goreyê huqûqê Tirkîya û huqûqê mîyanneteweyî ganî Ocalan azad bibo. Çunke bi mîlyonan kesî azadîya Ocalanî wazenê. Seba çareserîya demokratîke û aştîya daîmî ganî Ocalan azad bibo.”
Platformê Sazgehanê Demokratîkan reyde, teqrîben hezar kesî seba ke beşdarê “Rayîrşîyayîşê Çareserîya Demokratîke û Azadîye” bibê, vera awanîya DBP’î ya Amed de kom bîyî. Komî waşt ke hetanî Berê Koyî şêro û uca de beyanat bido çapemenî. La polîsan vernîya komî girewt û nêverda ke kom şêro.
‘No welat de Kurdî est ê’
Çîgdem Kiliçgun Uçare ard ziwan ke hemverê astengkerdişê Mudirîya Polîsanê şarê kurd têkoşînê Rojawanî rê wayîr vejîyeno û wina va: “Ma têkoşînê şarê Rojawanî bi hurmet silam kenê. Tirkîya, çeteyanê ke merdim nêeşkeno rîyê înan ra biewnîyo reyde xebityena. Bi nê çeteyan ma tehdit kenê.”
‘NATO û Tirkîya yew dîktatorîya newe awan kenê’
Uçare dewam kerd û wina va: “Sûrîye de bi wekeletê NATO û Tirkîya wazenê ke yew dîktatorî û şerîato awan bikerê. HTŞ û ANS-MSO vera têkoşînê şarê Kurdî bêheq ê. Dewlete vana ‘Ma do heqdarî reyde roniş masa ser.’ 2012 ra heta nika Sûrîye de hêzo tewr heqdare Hêzê Demokratîk ê Sûrîye yo.”
‘Bi mîlyonan azadîya Rêzdar Ocalanî wazenê’
Uçare wina dewam kerd: “26 serrî yo ke Îmrali de tecrîd est o. Ocalan ganî goreyê huqûqî azad bibo. Goreyê huqûqê mîyanneteweyî zî ganî azad bibo. Çunke bi mîlyonan kesî paştîye danê ey , o semed ra ganî azad bibo. Nê welatî de vîna ke demokrasî, aştî û çareserîya demokratîke ra vengê xo nêbirnena est a. Tîya de vîna ke demokrasî de îsrar kena esta.”
Uçare peynî de va: “Ewro Rojawa de Ermenî, Suryanî, Kurd û Ereb pîya ciwîyenê. Yew model virazîyayo. La Tirkîya wazena ke bi hêrîşan nê sîstemê bixeripna. Heta ke vîna şarê ma bêro pawitene ma do têkoşînê xo dewam bikê.”
