Colemêrg de bi pêşengîya Platformê Sazgehanê Demokratîk bi sloganê “Bijî berxwedana Rojava” rayîrşîyayîşêk ame kerdene. Rayîrşîyayîşî de pankartê “Em rê nadin dagirkeran, bijî berxwedana Rojava” ame akerdene û dowîzê “Rojava bikeve, mirovatî yê bikeve”, “Rojava biparêze”, “Bijî berxwedana rojava” û “Keziyên me berxwedan e” ameyê hewanayene. Dayîkê Aştî, parlamenter, hemşaredar û temsîlkarê sazgehan tewrê çalakî bîyê.
‘Şarê kurd do serkewo’
Girseyî dimayê rayîrşîyayîşî sirûdê “Çerxa Şorişî” wend. Dima ra Hemşaredara Wanî ya Şaristanê Girdî Neslîhan Şedal qisey kerd û bale ant têkoşînê kurdan ser o. Neslîhan Şedal îfade kerd ke ê ke şerê taybet rayra benê wa bizanê ke zîhnîyeto ke Rojhelatê Mîyanênî de serkewto, paradîgmaya cinîyan a şarê kurdî ya. Neslîhan Şedal dîyar kerd ke eke hêriş û qirkerdişî Rojava ser o dewam bikerê, kamca de kurdêk est bo, cinîyêk est ba, dostê kurdan est bî do reaksîyon bimojno.”
‘Ma Rojava tena nêverdê’
Parlamenterê DEM Partî yê Colemêrgî Vezîr Coşkun Parlakî zî qisey kerd û nê çîyî vatê: “Eke ma bibê yew ma do hemverê heme zehmetîyan vejîyê. Ma seba şarê Rojava silamanê xo erşawenê. Şarê kurdî û dostê xo Rojava tena nêverdanê. Wayîrvejîyayîşê Rojava çîyêko exlaqî û wijdanî yo. Ê ke Rojava rê wayîr nêvejîyenê, zerrîya înan de dişmenîya kurdan est a. Heta ke na dişmenî dewam bikera, na herre ser o do aştî zî nêba.”
Çalakî bi vatişê sloganan qedîyaye.
