Cinîyanê Wanî waşt ke Prosesê Aştî û Komelê Demokratîkî bidomîyo û girewteyî bêrê veradayene. Cinîyan îfade kerd ke destpêkê prosesî ra heta nika tu cenazeyî nêameyî, dayîkî nêbermenî û wina vat: “Aştî gula komel û welatî ya. Ganî kes aştî ra nêterso û destê xo aştî rê derg bikero.”
Prosesê “Aştî û Komelê Demokratîk” ke pê vengdayîşê Rayberê Şarê Kurdî Abdullah Ocalanî 27ê sibate de dest pêkerd, vakurê Kurdîstan û Tirkîya de dem û gamê tarîxî peyê xo de verdayî. Vengdayîşê Rayberê Şarê Kurdî Abdullah Ocalanî ser o, PKKyî 5-7ê gulane de Kongreya xo ya 12. viraşte û qerarê xofesixkerdişî da. Dimayê nê gaman, 11ê temmuze de grûbêka gerîlayan ke mîyanê înan de Hemsereka KCK’yî Besê Hozat zî est bîye çekê xo veşnayî; 26ê teşrîna verêne de zî gerîlayanê Têgêrayîşê Azadîye Qendîl de eşkera kerd ke ê sînoranê Tirkîya ra xo apey ancenê. Dewlete, vera nê pêro kerdişanê şênberan û gamanê tarîxî yê hetê kurdan zî, gama“Komîsyonê Demokrasî, Wayûbirayî û Yewîya Millî” tu gamêka şênbere nêeşta.
Cinîyanê Wanî derheqê Prosesê Aştî û Komelê Demokratîkî de qisey kerd û veng da dewlete ke gamanê şênberan bîerza.
‘Ganî girewteyî bêrê veradayene û gamê şênberî bêrê eştiş
Welatî Leyla Duman vera bêvengîya rayedaran nerazîbîyayîşê xo mojna û wina vat: “Seba ma tu çîyêk nêkenî. Ma azadîya rayberîya xo, azadîya xo, azadîya ciwan û cinîyanê xo û azadîya ziwanê xo wazenî. Rewşa zindanan serê pêro çîyan de ya. Lazim o kilîdê zindanan bêrê akerdene û girewteyî bêrê veradayene. Hende ciwanî zere de yê, gune yê. Girewteyê ma est ê ke 20-40 serrî yo zere de yê. Ganî êdî gamê şêberî bêrê eştiş.”
‘Ganî Birêz Ocalan azad bîbo’
Welatî Nazdar Aslan zî bal ant serê rewşa girewteyanê sîyasîyan û wina vat: “Ganî zindanî bêrê vengkerdiş û Birêz Abdullah Ocalan azad bibo.”
‘Aştî gula komel û welatî ya’
Zekîye Aslan bal ant eşkerayîyan ser o ke seba aştî yenî dayene û nê çîyî vatî: “27ê sibate de Birêz Ocalanî vengdayîşêk kerd û prosesêk da destpêkerdene. Şarê her çar parçeyanê Kurdîstanî seba na game û aştî amade yo. Bawerîya ma bi komelê ma est a. Ma bibê yew, ma do ser kewî. Çi heyf ke dewlete hema gamêk nêeşta. Heta ke Abdullah Ocalan azad nêbo, ne komelê tirkan ne zî yê kurdan azad nêbeno. Waştişê mi no yo ke dewlete game bîerza. Aştî gula komel û welatî ya. Ganî kes aştî ra nêterso û destê xo aştî rê derg bikero.”
‘Dimayê gama Rayberîye, cenazeyî nêyenî’
Welatî Kewê Işik zî dîyar kerd ke bawerîya înan heta peynî bi rêxistin, partî û Rayberê Şarê Kurdî Abdullah Ocalanî est a û wina qisey kerd: “Birêz Ocalanî waştişê aştî kerd û na aştî do mîyanê şarê kurd û tirkî de bêra awankerdene. Dimayê na gamaa Rayberîye, cenazeyî seba tu kesî nêameyî; ne seba kurdan ne zî seba tirkan. Şer nêqewimîya, dayîkî nêbermenî û kêfê ma pê na yewe zaf weş o. Ganî dewlete xo kerr û lal nêkera, destê xo aştî rê derg bikera. Proseso ke Birêz Abdullah Ocalanî da destpêkerdene zaf muhîm o; ganî her kes destê ey bigîro û nê destî veng nêverdo. Vengdayîşê mi seba pêro şaranê kurd, tirk, ereb, sunî û êzîdî yo, wa wirzê lingan ser, tifaqê xo xurt bikî û wa kurdî zî bibê yew. Ma do bîresî amancê xo.”
