Meclîsê Cinîyan ê DEM Partî ya Wanî bi munasebetê 25ê Teşrîna Peyêne Roja Têkoşînê Vera Şîdetê Cinîyan Ser o, zincîra însanan viraşte û da zanayene ke ê do wezîfeyê xo yê pêşengîye bi têkoşînê “Aştî û Komelê Demokratîkî” bidomnê.
Meclîsê Cinîyan ê Partîya Têduştî û Demokrasî ya Şaran (DEM Partî) yê Wanî bi munasebetê 25ê Teşrîna Peyêne Roja Têkoşînê Vera Şîdetê Cinîyan Ser o bi sloganê “Vera şîdetî, seba azadîye û têduştî ma pîya yê” Qada Şaristanî ya Wanî eşkerayî daye û zincîra însanan viraşte. Eşkerayî de pankartê “Seba azadîye û têduştî ma pîya yê” ame akerdene û sloganê “Jin jîyan azadî” ameyê vatene. Parlamentera DEM Partî ya Wanî Gulderen Varli, Hemsereka DEM Partî ya Wanî Gulşen Kurt, Dayîkê Aştî, rayberê DBP’yî yê qeza û merkezî, temsîlkarê sazgehanê sîvîl û xeylê cinî beşdar bîyê.
‘Ma do vera şîdetî têkoşînê xo hîna gird bikerê’
Hemsereka DEM Partî Gulşen Kurt eşkerayî de qisey kerd û bale ant tarîxê 25ê Teşrîna Peyêne. Gulşen Kurt îfade kerd ke ê sey cinî bi serran o vera polîtîkayanê dewlete yê camêrdîye têkoşîn danê û dîyar kerd ke ê têkoşînê wayanê Mîrabalî silam kenê. Gulşen Kurt dîyar kerd ke ê her serê sibayî bi kiştişê cinîyan, merganê biguman hewn ra wurzenê û vat: “Ma zanê ke nê mergê biguman ê cinîyan munferîd nîyê û polîtîk ê. Bicezanêkerdişê sîstematîk ê kiştişanê cinîyan encamê zîhnîyetê camêrdîye yê. Ma mîyanê cuyêk de yê ke her roje feqîrî û şîdetê cinîyan ser o vêşî beno. Ma sey cinî do vera şîdetî têkoşînê xo hîna pîl bikerê û ma do wezîfeyê xo yê pêşengîye ya vengdayîşê Aştî û Komelê Demokratîkî de bidomnê. Ma zanê ke demo ke proses serkewt, do cinî zî azad bibê.”
Qiseykerdişî ra pey cinîyan rayîrê Cumhurîyetî ser o zincîra însanan viraşte û sloganê “Jin jîyan azadî”, “Rojîn Kabaîş sedema serhildanê ye” û “Bijî berxwedana jinan” vatî.
