Cinîya kurd Dr. Ronay Bakan seba tezê xo yê doktorayî yê babeta “Polîtîkayê vûrîyayîşê demografîkî yê vakurê Kurdîstanî û şuxulnayîşê herre û mîrasê kulturî yo vera nasnameyê Kurdkî” ser o di xelatî girewtî.
Cigêrayox û akademîsyena kurd Dr. Ronay Bakan a ke Beşê Zanistanê Sîyasî yê Unîversîteya Johns Hopkins a Amerîka ra mezun bîya, seba tezê xo yê doktorayî yê “Polîtîkayanê vûrîyayîşê demografîkî yê vakurê Kurdîstanî û şuxulnayîşê herre û mîrasê kulturî yo vera nasnameyê Kurdkî” ser o di xelatê akademîkî yê muhîmî girewtî. Nê xelatî hetê Komela Zanistanê Sîyasî ya Amerîkî (APSA) ra ameyî dayene.
Xelatê ke Dr. Ronay Bakan girewtê wina yê:
- Xelata Tezê Doktorayî ya Tewr Başe: Her serre hetê beşê Rojhelatê Mîyanên û Vakurê Afrîka (MENA) ra tena seba xebata tewr serkewteye yena dayene.
- Xelata Taybet a seba Cigêrayîşê Seha ya Tewr Başe: Hetê beşê Demokrasî û Otokrasî yê Komele ra, seba cesaretê aye yê arêkerdişê datayan ê cayanê çetin de yeno mojnayene.
Panelê jurî xebata Dr. Ronay wina erjnaye: “Na xebate nimûneyanê tewr berz ê mîyanê cigêrayîşanê Rojhelatê Mîyanênî ser o ya û perspektîfêko bi temamî newe û orîjînal pêşkêş keno.”
Dr. Ronay Bakan nika sey cigêrayoxêka postdoktorayî Enstîtuyê Unîversîteya Ewropa de xebitîyena. Sey gama xo ya dîyine, aye qerar dayo ke Unîversîteya Fordham a bi prestîj a Amerîka de sey profesoreka hetkare dest bi xebate bikera.
