Çewlîg – Hemsereka DBP Çigdem Kiliçgun Uçare Çewlîg de dezgehanê sivîlan û çapemenîya herêmî reyde ameyî têhet. Çigdem Kiliçgun Uçar bale ante serê, qanûno çarçewayî û vat: “Gama ke ameya eştene wina kêm bo zî, ganî no sey destpêkêko bihêz bêro dîyayene.”
Bi wesîleya têhetameyîşanê “Ma Vaştişê Aştîye Şarî Reyde Saz Kenê” Hemsereka Pêroyî ya Partîya Herêman a Demokratîkan (DBP) Çigdem Kiliçgun Uçar û temsîlkaranê DBP ewro Çewlîg de dezgehanê sivîlan û çapemenîya herêmî reyde ameyî têhet.
‘Meseleya Kurdan teyna bi Tirkîya sînorin nîya’
Çigdem Kiliçgun Uçare ard vîrî ke, verê cû qerarê înkarkerdişê nasnameyê Kurdan rasterast meclîs de ameybî girewtene û wina vat: “Eynî meclîsî de ewro munaqeşekerdişê îradeyê azadîye û çareserîye, yew nuqtaya peyser şîyayîşêka pîla. Meseleya Kurdan teyna bi Tirkîya sînorin nîya, na mesela Rojhelato Mîyanên zî gêna xo mîyan û herêmîya. Şarê Kurdî nika herême de awankerdişê demokrasîyî de bi yew aktoro sîyasî yo bingeyîn o. Herindê têkoşînê çekdarî de avervejîyayîşê sîyasetê demokratîkî û awanbîyayîşê zemînê bê têkewtişî de, rolê têgêrayîşê azadîya Kurdan û Abdullah Ocalanî zaf muhîm o.”
‘Ma her kesî dawet kenê ke hetê aştîye û demokrasîyî de ca bigêro’
Çigdem Kiliçgun Uçare bale ante ser ke, qanûno çarçewa yo ke vejîyo, nika seba caardişê hewcedarîyanê şarê Kurdî û demokrasîyê Tirkîya bi temamî hîna kemîyo, û vat: “Gama ke ama eştene wina kêmî bo zî, ganî no sey destpêkêko bihêz bêro dîyayene. Bi hedefê paştîdayiş, qontrolkerdiş û temamkerdişê kêmanîyanê nê qanûnî, ma her kesî dawet kenê ke hetê aştîye û demokrasîyî de ca bigêro. Adresa aştîye Meclîs o”
