Rayberê MED-TUHAD-FED’î Şafî Hayme derheqê dergkerdişê cezayanê girewteyanê sîyasî reaksîyon mijna û vat: “Xeylê girewteyî rixmo ke cezayê înan qedîyenê zî înan bi hewayêko keyfî veranêdanê û cezayanê înan bi keyfî derg kenê.”
Goreyê rapor û daneyanê sazgeh û komelanê heqanê merdiman û huqûqî 402 hepisxaneyê Tirkîya û Vakurê Kurdîstanî, bi pêroyî 420 hezar û 904 hebî merdimî girewte yê. Rixmo ke kapasîteya nê hepisxaneyan 304 hezar û 964 o, 116 hezar û 18 girewteyî zafêrê kapasîteyî hepisxaneyan de girewte yê. Goreyê raporê CÎSST’î nisbetê pirbîyayîşî hepisxaneyan de se ra 138 o. Goreyê raporî cezaya 357 hezar û 646 girewteyan ameya qebulkerdene. 63 hezar û 258 merdimî zî rixmo ke muhakemekerdişê înan dewam keno, bêyî ke înan rê ceza bêra dayene, bê ceza yenê girewtene.
Goreyê raporê Komela Heqanê Merdiman (ÎHD) ê 28ê nîsana 2025î zî Tirkîya de tira 161 cinî, 1251 camêrdî, bi pêroyî tewr kêm 1412 girewteyê nêweşî est ê. Nê girewteyan ra 335 girewteyî rewşa înan giran a. 230 girewteyî tena bi sereyê xo nêeşkenê biciwîyê û ganî serbest veradîyê.
Tena Hepisxaneyê Îzmîrî de destpêkê serre ra heta nika cezaya 15 girewteyanê sîyasî ameya dergkerdene. Goreyê daneyanê Şûbeyê OHD’yî yê Îzmîrî destpêkê aşma Çele ra heta nika cezaya 15 girewteyan ameya dergkerdene û rixmo ke cezaya înan qedîyaya zî veranêdîyenê.
Rayberê Federasyonê Komela Huqûq û Piştgirîye ya Keyeyanê Girewte û Hukumwerdoxan reyde ê Medî (MED TUHAD-FED) Şafî Hayme derheqê dergkerdişê cezayanê girewteyan de qisey kerd û vat: “PKK’yî xo fesih kerd. Dima çekî îmha kerdê. Tewr peyên zî hêzê xo Tirkîya û vakurê Kurdîstanî ra apey antê. Veng da vengdayîşê Rayberê Şarê Kurdî Abdullah Ocalanî. La Tirkîya hema zî girewteyanê sîyasî veranêdana. Seba cuyêka hempare û bi tifaq ganî heme çî ra ver girewteyanê sîyasî serbest veradê. Ganî girewteyê nêweşî serbest veradîyê.”
‘Girewteyê nêweşî nêyenê veradayene’
Şafî Hayme da zanayene ke girewteyê nêweşî bi keyfî nêyenê veradayene û wina vat: “Ge-ge cezayê înan şeş aşmî reyêk seba serrêk derg kenê. Xeylê girewteyî rixmê cezayê înan zî bi hewayêko keyfî nêyenê veradayene. Dayîka Aştî Şefîka Kandal 65 serrî ya û girewteyêka nêweş a la reyna zî nêyena veradayene. Semîra Dîrekçî girewteya nêweş a. Mehmet Emîn Çam Hepisxaneyê Batmanî de nêweş o. Nêeşkeno lazimtîyanê xo bîyaro ca. Kasim Saglik Rîze de girewte yo. Hucre de yeno girewtene. Hayatî Kaytan Hepisxaneyê Bolu de nêweş o. Mehsum Yuksekdag Hepisxaneyê Erziromî de yo û nêweş o.”
‘Ganî Rayberê Şarê Kurdî Abdullah Ocalan veradîyo’
Şafî Hayme tewr peyên dîyar kerd ke muxatabê prosesî Rayberê Şarê Kurdî Abdullah Ocalan o û vat: “Ganî heme çî ra ver Rayberê Şarê Kurdî Abdullah Ocalan veradîyo. Heta nika komîsyonê Meclîsî tu game nêeşta. Ganî komîsyon şêro Abdullah Ocalan reyde qisey bikero. Girewteyê nêweşî veranêdîyenê. No komîsyon do senî bawerîye bido merdim. Ma wazenê meseley3e kurdan bi rayîrê sîyasî û huqûqî bêro çareserkerdene û ma pîya azad biciwîyê.”
