Hemverfeka Komîsyonê Ziwan, Kultur û Hunerî yê DEM Partîye Cemîle Turhalli bertek nîşanê qedexekerdişê qiseykerdişê Dayîkê Aştîye yê Komîsyonî de da û va ke bêvengkerdişê ziwanê dayîke aştîye rê zerar dano.
Komîsyonê Meclîsî yê ke seba çareserîyêka demokratîke ameyo awankerdene, roniştişê xo yê 5. qiseykerdişê kurdkî yê Dayîkê Aştîye birna û nêverda ke dayîkî bi ziwanê xo qisey bikerê.
Babete ser o Hemverfeka Komîsyonê Ziwan, Kultur û Hunerî yê DEM Partîye Cemîle Turhalli ajansê ma rê qisey kerd.
‘Nêzdîbîyayîşêko winayin o cîyakerî ma qebul nêkenê’
Hemverfeka Komîsyonê Ziwan, Kultur û Hunerî yê DEM Partîye Cemîle Turhalli va ke roja 20ê Tebaxa 2025î de, kombîyayîşê Komîsyonê ‘Demokrasî, Wayûbirayî û Paştdayîna Mîlîye’ TBMM de, qiseykerdişê Dayîkê Aştîye Nezahat Teke û Rebia Kiranî yê kurdkî ke ziwanê înan ê dayîke yo, hetê Serekê Komîsyonî ra ame birnayene û înan ra ame waştene ke tirkî qisey bikerê û wina va: “Ma nê prosesê krîtîkî de ke Tirkîya de hewl bena ke hêvîya aştîye newe ra awan biba, nêzdîbîyayîşêko winayin yê cîyakerî qebul nêkenê.”
‘Aştîyêka bi rûmet şert a’
Cemîle Turhalli eşkera kerd ke paştdayina birayî, bi hurmetdayîşê ziwanê dayîke yê yew komelî dest pêkena û wina domna: “Bêvengkerdişê ziwanê dayîkêke nêşinasnayîş û hesabnêkerdişê rûmet, tarîx û waştişê aştîye yê yew şarî yo. Aştîye, bi goşdayîş û fehmkerdişê waştişanê dayîkan, mumkîn bena. Çimkî dayîkî hezaran serrî yo wayîrîya ziwanê xo kerdê û mîrasê domananê xo rê veradayê. Seke Dayîka Nezahat vana, “Bi definkerdişê çekan, nê yê domanan” aştîyêka bi rûmete eşkîyena bêra awankerdene.”
Wayîrvejyayîşê ziwanî, deynê her kesî yo
Cemîle Turhalli qiseyê xo wina qedîna: “Cîyakerdişê ziwanan, yewîye û demokrasî yê komelî rê zerar dano. Aştîye, wareyêko winayin de kok ro dana ke tede ziwanî resenê şaranê xo û her yew bi hawayêko azad xo îfade keno. Ma Komîsyonî ra wazenê ke gorê prensîpanê “paştdayîne” û “birayî” yê ke nameyê xo de est ê, têbigêro û nê nêzdîbîyayîşê xo yê qedexekerî yê vera ziwananê dayîke reyna çim ra bivîyarno. Aştîyêka raştikêne, ancax zeminêko winayin ser o eşkîyena bêro awankerdene ke uca de wayîrvejyayîşê ziwanî û deynê her kesî yo.”
