Dayîkanê Aştîye ke bi waştişê azadîya fîzîkî ya Rayberê Şarê Kurdan Abdullah Ocalanî û eştişê gamanê şênberan ê seba prosesî nobete de yê, nobeta xo bi deyîran heta nêmeyê şewe dewam kerd.
Meclîsê Dayîkanê Aştîye bi waştişê azadîya fîzîkî ya Rayberê Şarê Kurdan Abdullah Ocalanî û eştişê gamanê şênberan ê Prosesê Aştîye û Komelê Demokratîkî de Parka Kurtuluşî ya qezaya Çankaya de nobete de yo. Endam û temsîlkaranê partî, dezgeh û rêxistinanê komelkîyan çadirê dayîkan zîyaret kerd. Dayîkanê Aştîye ke heta şewa derge nobeta xo dewam kenê, bi deyîran û berzkerdişê sloganan civata xo kerde geş. Dengbêj Serdar Cananî ke seba piştîdayîşî dayîkî zîyaret kerdî, dayîkan reyde deyîrî vatî û piştîdayîşê xo ard ziwan.
Dayîkî do heta meşte çadir de nobeta xo dewam bikerê û meşte zî şêrê meclîs û uca de partîyanê sîyasîyan reyde pêdîyayîş bikerê.
