Programê meşte yê Dayîkanê Aştî dîyar bi ke bi waştişê azadîya fîzîkî ya Rayberê Şarê Kurdî Abdullah Ocalan û seba ke gamê şênberî yê Prosesê Aştî û Komelê Demokratîkî bêrê eştene ameyî Anqara. Dayîkê Aştî do meşte partîyanê sîyasîyan reyde pêvînayîş bikerê ke parlamento de yê.
Meclîsê Dayîkanê Aştî ke nêzdîyê 300 dayîkan ra yeno pê, 24 şaristananê Vakurê Kurdîstan û Tirkîya ra bi waştişê azadîya fîzîkî ya Rayberê Şarê Kurdî Abdullah Ocalan û eştişê gamanê şênberan ê Prosesê Aştî û Komelê Demokratîkî ame Ankara. Badê eşkerayîya Parka Meclîsî Dayîkê Aştîye şîyî Parka Kurtuluşî ya qezaya Çankaya. Dayîkan uca de konî ronayî û dest bi nobete kerd. Dayîkî do şewe konan de bimanê û meşte meclîs de zîyaretê partîyanê sîyasîyan bikerê.
Programê zîyaretê Dayîkanê Aştî
Heyetêkê Dayîkanê Aştî do meşte saete 11:00î de Grûba Yenî Partî Serekwekîlê Grûbe Alî Mahîr Başarirî reyde pêbivîno. Dayîkî do saete 12:00î de zî Grûba Yenî Yol Serekwekîlê Grûbe Mehmet Emîn Ekmenî reyde pêvînayîş bikerê. Heyetê Dayîkanê Aştî do saete 14:00î de Grûba MHP’yî Serekwekîla Grûbe Fîlîz Kiliçe reyde, saete 15:00î de zî Grûba AKP’yî Serekwekîlê Grûbe Abdullah Gulerî reyde pêvînayîş bikerê. Heyet do saete 16:00î de Grûba CHP’yî Serekê Pêroyî yê CHP’yî Kemal Kiliçdaroglu û Serekwekîla Grûbe Sevda Erdan Kiliçe reyde pêvînayîş bikero.
Sewbîna Dayîkanê Aştî Wezaretê Edaletî ra waştişê pêvînayîşî kerdo û cewabî pawenê.
