Temsîlkaranê elewî û dûrzîyan Konferansê Yewhelwestîya Pêrabesteyî yê Vakur û Rojhelatê Sûrîye rê mesajî şawitî û bale ante yewîye û yewbînangirewtişî ser.
Konferansê Yewhelwestîya Pêrabesteyî yê Vakur û Rojhelatê Sûrîye ke bi beşdarîya nezîkê 500 temsîlkaranê Îdareyê Xoserî yê Demokratîkî, sazîyanê sîyasîyan, eskerîyan û asayîşî û temsîlkaranê pêrabesteyê Vakur û Rojhelatê Sûrîye virazîyeno, dewam keno.
Serekê Meclîsê Dînî yê Meclîsê Îslamî yê Elewîyan ê Berzî yê Sûrîye û Dîaspora Şêx Xezal Xezalî û Serekê Ruhanî yê Cimatê Misilmanan ê Miwehidînan (Dûrzî) Şêx Hîkmet El Hîcrî mesajê xo yê bi dîmen (vîdeo) şawitî konferansî.
Mesajan de paştîdayîşê armancanê konferansî û girîngîya yewîye seba vera zehmetîyan de vindertişî ameye mojnayêne.
Şêx Xezal Xezalî mesajê xo yê bi dîmenî de seba konferansî wina va: “Ma nê konferansî pîroz kenê. No konferans seba heme şarê Sûrîye yo. Gerek ma bi yewrêzîye vera zulm û cîyakarîye de ke zerîya ma hemanan veşnaya, bivinderê. Fikrê tarî sûrîyeyîjî vera yewbînan de vetî, rûmet binpay kerd û çîyê bimbarekî talan kerdî. Ma perav de hadîseyê dejinî dîyî û hema zî dewam kenê. Dima Kîlîseyê Mar Îlyasî teqna û vera Siwêda de dest bi hêrişan kerd. Çîyê ke vera kurdan ameyê kerdêne, ma xo vîr ra nêkenê. Gonî yew a, kerde yew o û sîvîlan bedelêko giran da.
Bê yew çareserîya sîyasîye ke heqanê heme pêrabesteyan misoger bikero, yew paştîya ewleyî nêvirazîyena. Ma bawer kenê ke heqe xo resnayîşê nêmerkezî yan zî federalî de ya ke xususîyetanê dînî, kulturî û cîyayî yê her pêrabesteyî pawena. Ma dewletêka laîke wazenê ke dînî sîyaset ra cîya bikero. Seba ke gonîrişîyayîş û şer bêro vindarnayene, ma paştî danê yewbînan. Gerek ma leze, pîya û bi mesûlîyet bigurîyê, seba ke xo birêsnê rayîrê azadîye û edaletî. O rayîr do Sûrîyeyêka layîqê şarê xo awan bikero.”
Zafrengî gef nîya, dewlemendîya yewîya ma xurt kena
Şêx Hîkmet El Hîcrî zî mesajê xo de wina va: “Ey wayûbirayî, ma wextêk de yê ke zehmetîyî zaf ê. Ma ewro nê kombîyayîşî de bale anenê ser o ke ma teyîd bikerê ke yewhelwestîya pêrabesteyanê Vakur û Rojhelatê Sûrîye cewabê qîrayîşê şarî ya ke şerî o keno mende. Ma hetê wayûbirayanê xo yê heme pêrabesteyanê Sûrîye de vinderenê û teyîd kenê ke zafrengîye gef nîya û dewelemendîyêka ke yewîya ma xurt kena. Paştîdayîşêko ke paştîya ma awan keno. Wa no konferans bibo destpêkê rayîrêko newe yê qewînkerdişê merdiman yê welatêk de ke bi mezheban nêro pîmayene.”
Konferanse bi qiseykerdişanê temsîlkaranê pêrabesteyan dewam kena.
