Şaredarîya Amedî û Weşanxaneyê Vateyî bi munasebeta 21ê Sibate Roja Ziwanê Dayîke ya Dinya şayîyêk bi konser viraştê. Verê konserî Hemşaredara Şaredarîya Amedî Serra Bucak û Ziwanzan Malmisanij bal antî ser muhîmîya ziwanî.
Şaredarîya Şaristanê Girde ya Amedî û Weşanxaneyê Vateyî bi munasebeta Roja Ziwanê Dayîke ya Dinya, Çand Amed de şayîya “Şewa Kirmanckî” viraştê. Verê konserî resepsîyon virazîya, resepsîyonî ra Hemsereka Partîya Heremê Demokratîke (DBP) Çîgdem Kiliç Uçar, Parlementera DEM Partîye ya Mêrdînê Salîha Aydenîz, Hemşaredara Şaristanê Girde ya Amedî Serra Bucak û Verfeka Komîsyonê Ziwan, Kultur û Hunerî yê DEM Partîye Cemîle Turhalli, Ziwanzan û temsîlkarê sazî û dezgeye beşdar bîyê.
Hêrişê zaravayê kurdkî kenê
Resepsîyon de Hemşaredara Şaredarîya Amedî Serra Bucak qise kerd û vat ke zaravayê kurdkî bi hêriş û qedexeyan ra rî bi rî manenê, armancê înan no yo ke wa ziwanê kurdkî vînî nêbo û no ser ganî ziwanê kurdkî wa bibo ziwanê perwerdeyî û fermî.
Ziwanzan Malmisanij zî muhîmîya ziwanî ser o qise kerd.
Dima zî deyîrbaz Celo Boluz, Derya Cengîz, Eylul Nazlier, Xoser Rayîrwan, Wusar vejîyayê ser sehneyî û deyîranê Kirmanckî vatê. Helbestvan Bedrîye Topaç, Omer Barasî, Îdrîs Yazar û Mem Keleş Çiçek zî helbestên Kirmanckî wendê.
