Verfeka DEM Partî Ayşegul Dogan dîyar kerd ke Heyetê DEM Partî yê Îmralîyî 24ê gulane ra nat Rayberê Şarê Kurdî Abdullah Ocalanî reyde pêvînayîş nêkerdo û wina vat: “Çira heyetê DEM Partî 40 rojî yo nêeşkeno pêvînayîş bikero? Verkarê qanûnî ma rê nêameyo. Ma nêzanê muhtewayê ey de çi est o. Vanê verkar birêz Ocalanî rê şîyo û ey vato temam. La ma do senî teyît bikerê ? Heyetê ma nêeşkeno pêvînayîş bikero.”
Verfeka DEM Partî Ayşegul Dogan derheqê averşîyayîşanê rojevî de Merkezê Pêroyî yê DEM Partî de kombîyayîşê çapemenî viraşt. Ayşegul Dogan îfade kerd ke Heyetê Rayraberdişê Merkezî yê DEM Partî kombîyayîşê xo de averşîyayîşê muhîmî munaqeşa kerdê û wina vat: “Prosesê qanûnê çarçewa rojevo sereke yo. Pawitişê şarî seba demokratîkbîyayîşî Tirkîya est o. La çi heyf ke ma nêeşkenê demokratîkbîyayîşê Tirkîya ser o çîyanê pozîtîfan vajê. Komedyenê bi nameyê Denîz Goktaş vizêrî ame destbendkerdene. Ganî caardişê vera demokrasî bêrê hewanayene. Ma paştîdayîşê xo seba Denîz Goktaşî îlan kenê û vanê ganî nê caardişê vera huqûqî biqedîyê”
‘Rayedarê îqtîdarî vera îdiayan bêveng ê’
Ayşegul Dogan bale ante averşîyayîşanê prosesê Aştî û Komelê Demokratîk û wina dewam kerd: “Agahîyê zaf şaşî yenê vilakerdene. Sey DEM Partî seba no proses bireso netîce û zemînê demokrasî bêro xurtkerdene, ma bi hesasîyet têgêrayê. La çi heyf ke nê deman de agahîyê ne rast û îdiayê nêyenê qebulkerdene, yenê vilakerdene. La rayedarê îqtîdarî vera nê agahîyan bêveng ê. Ma zî serê de vanê eke bingeyêko qanûnî çin bo do tehlukeyî vejîyê vernîya prosesî. Seba ey zî ganî takwîmêk bêro dîyarkerdene. Nê demê peyênî de agahîyê pozîtîfî zî est ê. Serê wextê qanûnê çarçewaya mutabakatêk, pêkerdişêke est o. La seba teqwîmî çîyêko ameyo dîyarkerdene çin o. Mutabakat est o ke verê ke Meclîs bikewo tehtîl, qanûnê çarçewa do bêro rojêv”
‘Qanûnê bêçekkerdişî ganî nêro kategorîze kerdene’
Ayşegul Dogan dîyar kerd ke qanûnê çarçewa de do çi bibo hema dîyar nîyo û nê çîyî ardî ziwan: “Rêxistine çekê xo veşnayê. Ganî prosesê çekveradayîşî garantî bibo û îqtîdar û partîyê sîyasî zî naye ser o vinderê. Do senî bêçekbîyayîş garantî bibo; Bi demokratîkbîyayîş û garantîya huqûqî mumkun o. Seba aye zî hewcedarî bi qanûnê çarçewayêka hîra est a. Birêz Ocalan zî eşkerayîya 27ê sibate dîyar kerd ke hewcedarî bi qanûn est a. Seba aye qanûnê bêçekkerdişî ganî nêrê kategorîkerdene. Kategorî kerdene bi Tirkîya dano vîndîkerdene. Ganî ma tecrubeyê verênan ra dersê vejê. Qanûnê çarçewa gamêka muhîma seba paştîya bêçekkerdişî, la do çi bibo? Ganî destûr nêro dayene ke derheqê zereyê qanûnê çarçewa de agahîyê zûrî yenê vilakerdene.”
‘Ganî bi ziwanêko pozîtîf bêro qisey kerdene’
Ayşegul Dogan bale ante serê raporê hempar ê Komîsyonê Meclîsê û qiseykerdişê xo wina dewam kerd: “Komîsyonê Meclîsê serê fikrê heme partîyan raporêk amade kerd. Reyna bi muzakereyan qanûnê çarçewa eşkeno bêro amadekerdene.
Hewceyî bi qanûnêke seba agêrayîşê endamanê rêxistine est o. Na seba prosesî hewcedarîyêka bingeyîna. Birêz Numan Kurtulmuş qanûnê çaçewa ser vano ganî nêro ereyvistiş û çîyêke tebera nêro verdayene. Ma zî tewrê nê vateyan benê. Reyna Kurtulmuş vano no qanûn do seba reyke bêro vetene. Seba ma muhîm nîyo çende raye bêro vetene. Ma wazenê endî kes nêro kiştene. Ganî bi tu hawayî peşke ro nê prosesî nêro pirodayene, yanî rayîr vera provokasyonan bêro girewtene. Birêz kurtulmuş vano, ‘Yê ameyî do bêrê, yê ke nêameyî zî ey zanê û berê înan rê girewteyê.’ Ganî seba prosesî ziwanêko pozîtîf bêro bikar ardene. No ziwan rast nîyo. Ganî ziwanêko vajo bera heta peynî do akerde bo bêro bikar ardene. Pabeyê ma birêz Numan Kurtulmuşî ra na bî. La çi heyf ke ziwanêke fikaran virazeno bikar ano.”
‘Heyetê ma nêeşkeno birêz Ocalanî reyde pêvînayîş bikero’
Ayşegul Dogan derheqê rewşa Rayberê Şarê Kurdî Abdullah Ocalan de zî no erjnayîş kerd: “Birêz Bahçelî vengdayîşê Birêz Ocalanî kerd. Birêz Ocalanî zî veng da rêxistina xo kerd goreyê ey ra gamî ameyê eştene. Nika ma resayê serrgêra veşnayîşê çekan. Birêz Ocalan waştêne bi beşanê cîya yê komelî ra pêvînayîş bikero. Ma zî zaf rayan vat ganî şertê birêz Ocalanî bêrê vurnayene. Seba serkewtişê prosesî ganî berê îmralîyî bêrê akerdene û birêz Ocalan heme kesan reyde pêvînayîş bikero. Tewlê ke birêz Ocalan proses ardo na merhela zî şertê birêz Ocalan nêyenê başkerdene. Tecrîd hem dewam keno û hem zî pêvînayîş yeno astengkerdene. Çira berê Îmralî nêyenê akerdene ? Çira Heyetê DEM Partî 40 rojî yo nêeşkeno birêz Ocalanî reyde pêvînayîş bikero? Verkar ma rê nêameyo. Vanê verkar birêz Ocalanî rê şîyo qebul kerdo. La ma do senî teyît bikerê. Avukatî nêeşkenê pêvînayîş bikerê. Ma do senî bizanê ke birêz Ocalanî no verkarê qanûnî qebul kerdo. Te na ma zanê ke 25 gulane de pêvînayîşêk ameyo kerdene. Ma aştî de israr kenê û ma do israr bikerê zî. Ma do nê qerarê xo bidomnê. Eke şima pêvînayîş bi birêz Ocalanî reyde bi rêk û pêk nêkerê do rayîr verê munaqeşeyanê xetimîyayîşê prosesî akero. Birêz Ocalan vano, vindertiş seba prosesî rîsk vejeno.”
Amadekarî kongre
Ayşegul Dogan ard ziwan ke amadekarîyê seba kongreya partîya înan zî dewam kenê û wina vat: “Sloganê kongreya ma dîyar bî. Ma bi şîarê, ‘Seba Komara Demokratîk Komelê Azad û Rêxistinkerde” konferansanê xo virazê û xo biresnê heme beşê komelî. Ma zî prosesêk vurîyayîş û ravurîyayîşî ra derbas benê û munaqeşeyan naye ser kenê. Programê partîya ma zî yeno hedrekerdene. Programê partîya ma do heme beşê komelî bigîro mîyanê xo û serê esasê îradeyê herêmî do bibo. Ma badê konferansanê şaristanan, konferansanê herêmî virazê û dima ra konferansê cinîyan 20-21ê tebaxe de û konferanso gird zî 22-23ê tebaxe de virazê. Badê nê konferansan zî ma do kongreya xo ya girde virazê.”
‘Ganî verkar partîyanê sîyasî reyde bêro parekerdene’
Ayşegul Dogan serê persê rojnamegeran ê derheqêe eşkerayîya KCKyî de zî dîyar kerd ke pêkerdiş yan zî mutabakat seba qanûnê çarçewa zaf muhîm vînenê û wina vat: “Aşma temmuze de qanûnê çarçewa do bêro rojevê Meclîsî. La tarîxî ci zelal nîyo. Hema zî ma muhtewayê qanûnê çarçewa nêzanê. Ma nêzanê çi ameyo amadekerdene. Xeylê agahî yenê vilakerdene la rast ê yan rast nîyê ma nêzanê. Heyetê ma xeylê pêvînayîşî kerdî. AKP’yî reyde pêvînayîşî viraştî. Serê qanûnê çarçewa de dayîş û girewtiş ameyî kerdene. La heta nika verkarêqanûnî ma reyde nêameyo parekerdene. Ganî no verkar ma û partîyanê sîyasî reyde bêro parekerdene û badê mutabakatî bêro rojevê Meclîsî.”
‘Ganî qeyûmî bi temamî bêrê hewanayene’
Ayşegul Dogan serê persa derheqê qeyûman de zî dîyar kerd ke demê qeyûman yeno dergkerdene û seba hewanayîşî qeyûman averşîyayîşêk newe çin o û vat: “Ganî na polîtîka û caardişê qeyûman bi temamî werte ra bêrê hewanayene.”
Ayşe Dogan serê persa vurîyayîşê nameyê DEM Partî zî dîyar kerd ke do konferansan de vurnayîşê nameyî bêro erjnayene û dima ra zî do hem vurnayîşê nameyî û xeylê madeyê qerarî û programê bêrê dîyarkerdene.
