Konferanso ke Partîya Dem’î Riha de organîze kerd de Verfeka Desteya Rayberîyanê Herêmî ya Demokratîk Canan Kebenç Ozkan qisey kerd û bale ante rolê bingeyîn yê rayberîya herêmî ya awankerdena komelo demokratîkî ser o û wina vat: “Awankerdişê pargalêko ke tede şar xo bi xo îdare bikero, rayberîya herêmî dest pêkeno.
Konferanso ke Desteyê Rayberîya Herêmî yo Demokratîk ê Partîya DEM’î bi sloganê “Komîn şaredarî ya, şaredarî komîn a” ameyo organîzekerdene, Riha da dewam keno. Endamê Rihaye yê Konferansî, Salonê Konferansî yê Tahîr Elçî yê Baroyê Riha de amê têhet. Konferansî de delegasyonê Riha û Semsûrî hedre bî.
‘Proses berpirsîyaranê muhîman ferz keno
Qiseykerdişê destpêke yê konferansî, hetê Verfekê Desteyê Rayberanê Herêmî yê Demokratîk Canan Kebenç Ozkanî ame kerdene. Ozkan bale ante netîceyanê weçînitişê herême yê 31ê adara 2024î ser û dîyar kerd ke serdemo newe seba awankerdena aştî û komelo demokratîk berpirsîyaranê muhîman ma ser o ferz keno.
‘Xo îdarekerdene reyberîyanê herême ra dest pêkeno’
Canan Ozkan destnîşan kerd ke komelo demokratîk rayberîyanê herêmî ra xoser nênê fikirîyayiş û wina qisey kerd: “Awankerdişê pergalêko ke tede şar xo bi xo îdare bikero, rayberîya herême dest pêkeno. Seba azadîya şarê Kurdî û nîzameko huqûqî yo demokratîk, rayberê herême wayîrê rolêko krîtîk ê.
‘Şaredarî tevgerê xelisnayîşê riyê erdî yê’
Dewamîya qiseyê xo de Ozkan, vatişê Rayberê Şarê Kurdî Abdullah Ocalanî “Şaredarî tevgerê xelisnayîşê rîyê erdî yê” ard vîr û îfade kerd ke ganî şaredarî tena sey sazîyanê xizmetkarî ney, eynî demî de seba çaresekerdena problemanê komelî de bibê merkez.
‘Çareserî komîn û şaredarîyan de ya’
Canan Ozkan problemanê komelî sey şer, xizanî, koçberî, qirkerdişê cinîyan û madeyê kungkerdişî ser o vindert û destnîşan kerd ke no krîz eşkeno bi destê rayberî yê herêmî û komînan bêrê çareserkerdene. Ozkan eşkera kerd ke binawanîya şaristanî ra heta xebatanê kulturî, projeyanê ekonomî û hetanî xebatanê weşîye, wareyanê xeylî hîran de ganî rayberîyê herêmî rol û berperîsyêka aktîf bîgêro.
Konferans bi nîqaşan dewam keno
Badê qiseykerdişê Ozkane, sînevîzyonêk ke dîyayîşê Abdullah Ocalanî yê komîn û rayberîyê herême ser o yê ame mojnayene. Dima ra konferans, çapemenîye rê ame girewtene, bi roniştişan nîqaşî dewam kerdê.
