Rayberê PKK’yî Abdullah Ocalan dîyar keno ke aştî tena esasê xopawitişî ser o eşkena manayêk bigêra û vano: “Sistemê dewleta neteweyî û sistemê konfederalîzm o demokratîk bi aştîyane ke prensîb û şert û mercan reyde benê cuye, wexto ke nê şert û prensîbî binpay benê têkoşînê xopawitişî, seba azadî, seyhuqûqî û rayîrşîyayîşê komelê demokratîkî yê tarîxî hîna munasib o.”
Vengdayîşê Serekê MHP’yî Dewlet Bahçelî ya 1ê teşrîna 2024î ya ke va: “Wa Abdullah Ocalan bêro Meclîsa Gird a Tirkîya, grûba DEM Partî de veng bido û rêxistina xo tesfîye biko.” 23ê teşrîna 2024î de birazayê Abdullah Ocalanî, parlamenterê DEM Partî Omer Ocalan şi Girawa Îmrali û Rayberê PKK’yî Abdullah Ocalanî reyde pêvînayîş kerd. Nê pêvînayîşî de Abdullah Ocalanî raya pêroyî reyde mesajêk pare kerd û va: “Hêzê mi min o teorîk û pratîk esto ke ez meseleyê kurdî zemînê şerî ra bivurna zemînê huqûq û sîyasetî.” Dima 28ê kanûna 2024î û 22ê çele ya 2025î de Heyetê DEM Partî yo ke Sirrî Sureyya Onder û Pervîn Buldanî ra pê ame, şîyê Girawa Îmrali û Abdullah Ocalanî reyde pêvînayîş kerd. Pêvînayîşo verên de mesajêko ke 7 nuqteyan ra pê yeno ame parekerdene. Dima ke mesaj ame parekerdene munaqeşeyê çareserkerdişê meseleyê kurdî dewam kenê. La heta nika seba aştî û çareserî hetê dewlete ra qet yew game nêameya eştene. Îqtîdar tena ronayîşê çekan keno rojev û hêrişanê xo yê leşkerî yê verba Vakur û Rojhelatê Sûrîye domneno. Reyna operasyonê talankerdişê îradeyê şarî zî dewam kenê. Yew hetî ra tepiştiş ê rojnameger û sîyasetmedaran, hetêko bîn ra zî tayînkerdişê qeyûman dewam keno.
‘Aştîya bêpawite îfadeya teslîmîyet û koleyî ya’
Abdullah Ocalan dîyar keno ke rewşa şerî, rewşa nêbîyayîşê aştî ya û aştî tena esasanê xopawitişî ser o eşkena manayêk bigêra û vano: “Aştîya bê xopawitişe eşkena biba îfadeya teslîmîyet û koleyî. Cewhera aştîya bêpawite ke ewro lîberalîzm şar û komelan ser o ferz keno, bi taybetî kayê ke bi nameyê asayîş û pêameyîşê demokratîkî yo. Teber ra nimitişê serdestîya sinifê burjuwazî ke bi hewayêko yewhete bi hêzê çekdarî ya temame, yanî ramitişê rewşa şerê nimite, yeno kerdene, tu manaya aye çin a.”
‘Modernîteya kapîtalîste de aştî çekuyêka pirê daman a’
Abdullah Ocalan dano zanayene ke aştîyêka bê xopawitişê cewherî sey aştîyêka raştikêne mojnayîş hewldayîşo tewr gird ê hegemonyaya sermaya îdeolojîk aseno û wina vano: “Tarîxî de bi ‘têgînanê pîrozan’ xo bi hewayêko bîn îfade keno. Çekuya aştî şert û mercanê modernîteya kapîtalîste de çekuyêka pirê daman a. Şuxulnayîşê aye bê pênaseya raşte zaf bi tehluke yo. Seba ke reyna bêro pênasekerdene aştî ne bi temamî wedaritişê şerî yo, ne zî rewşa asayîş û nêbîyayîşê şerî ya ke bin serdarîya yew hetî der a. Aştî de hetî est ê; serdarîya mutleqe ya yew hetî çin a û ganî nêbo zî. Ya hîrêyine, çekî ser bingeyê razîbîyayîşê karûbarê sazûmanîya exlaqî û sîyasî ya cewherî ya komelî yenê bêvengkerdene.”
Aştî ancax bi xurtbîyayîşê komelê exlaqî û polîtîkî mumkin a
Abdullah Ocalan qisey keno ke wexto ke sazîyê exlaqî û polîtîkî yê komelî bixebitîyê, proseso ke bi hawayêko xozayî vejîyeno meydan, prosesê sîyasetê demokratîk o û vano: “Êyê ke wazenê aştî biba zî ganî bizanê ke serkewtiş ancax wexto ke sîyaset ser bingeyê exlaqî rolê xo kay biko bi ca yeno. Aştî bi îradeyê xo, pîya ciwîyayîşo bêçek, bêkiştiş o hêzanê komelê exlaqî û polîtîkî û hêzanê yewdestdaranê dewlete mumkin a. Herinda ke komel dewlete bixeripno û dewlete komelî bixeripno, rewşê aştî yê bi şert û mercan ke ci rê pêameyîşê demokratîkî yeno vatene, rewşê tarîxî yê. Tarîx ne temamî îfadeya komelêka tena exlaqî û polîtîke sey şaristanîya demokratîke ya û ne zî şiklê sistemanê şaristanîye de sey îfadeya komelêka tam sinfî û dewletî yena ciwîyayene. Tarîx sey têkilî û nakokîyanê ke yewbînan mîyan de yê, rewşê ke game şer o game aştî ya yena ciwîyayene.”
