Seba projeyê Zenkar-2 ke şarê taxe 15 rojî yo vera talanî têkoşîn keno, qerarê vindarnayîşê îcrayî ame dayene. Komîsyonê Huqûqê Dorûverî û Şaristanî yê Baroyê Amedî vat: “Ma do waranê cuye heta peynî bipawê.”
Taxa Arzoxlî ya qezaya Sûrî ya Amedî de seba “Santralê Enerjîya Rojî û Tesîsê Depokerdişê Enerjî yê Zenkar-2” ke plan bîyo bêro viraştene, xebata şirkete binê pawitişê leşkeran de dewam kena. Şarê taxe zî vera nê projeyî nobeta konan dest pêkerd. Şarê ke 15 rojî yo vera talanî vindeno, Zenkar-2 mecbur kerd ke gamêk peyser bierzo.
Projeyê Zenkar-2 waşt ke warêkê sîtê tarîxî û merge ser o bêro awankerdene. Komîsyonê Huqûqê Dorûverî û Şaristanî yê Baroyê Amedî ke vera nê projeyî dewaya betalkerdişî akerda, hesabê xo yê medyaya dîjîtale ser ra eşkerayî da û da zanayene ke Dadgeha Îdarî ya 1. ya Amedî îcra vindarna. Sebebê qerarî no yo ke proje do weşîya merdiman, xebatanê citkarîye û mîrasê tarîxî û kulturî rê zerar bido.
Komîsyonî vat: “Ma raya pêroyî rê dîyar kenê ke ma do waranê cuye heta peynî bipawê û têkoşînê huqûqî dewam bikerê.”











