Enqere – Seba Zîrweyê 36. ya NATO’yî de, Sekreterê Pêroyî yê NATO’yî zirweyî ra ver yew meqale de dîyar kerdbî ke no zîrwe seba caardişê qeraranê Zîrweyê Laheyî virazîyeno û vat ke goreyê qeraran viraştişê çekan do zêde bibo û behsê şerî kerd.
Qesra Serekomarî ya qezaya Anqara ya Yenimahalle de Zîrweyê 36. yê NATO’yî yeno viraştene. Serek û wezîrê 32 dewletanê ke endamê NATO’yî yê do zîrwe de amade bê. Zîrwe do 2 rojî dewam bikero û dima zî reyna Anqara de mabênê serekanê dewletan de pêvînayîşî bêrê kerdene. Zîrweyê NATO’yî do xo reyde çi bîyaro, do herêm de senî yew tesîr bikero, do senî yew rol bidîyo Tirkîya û serê şerê herême de tesîrêk senî bikero, yeno munaqeşekerdene. Verê Zîrweyê NATO’yî Walîtîya Anqara 28ê hezîranî ra heta 10ê temmuze kuçeyan de çalakî û eşkerayî qedexe kerdî. Seba ke vera Zîrweyê NATO’yî reaksîyon nêvejîyo, zafanê şaristanê Vakurê Kurdîstanî û Tirkîya de operasyonê eştişê serê keyeyan virazîyayî û nê operasyonan de zêdeyê 4 hezar kesî ameyî destbendkerdene. Nînan ra nêzdîyê 300 kesî ameyî girewtene.
Anqara de rewşa awerte
Anqara de her çiqas rewşa awarte nêameya îlankerdene zî, bi awayêko fîîlî rewşêka awarte esta. Çike dima destbendkerdiş û girewtişan, Anqara de heme kuçeyî hetê polîsan ra ameyî padayene û welatî rastê sehnayîş û kontrolkerdişê nasnameyan yenê. Sewbîna, keyeyê ke nêzdîyê otelanê serekanê dewletan de yê zî ameyî vengkerdene û welatî otelanê bînan de ameyî cakerdene. Keyeyê kanî yê ke sey ‘gecekondu’ yenê pênasekerdene zî seba ke nêase, dorê înan ame padayene. Reyna zî, cayê sey werdgeh, kafe û dikanê ke nêzdîyê otelanê serekanê dewletan de yê zî ameyî padayene.
Muhtewaya Zîrweyê NATO’yî
Sekreterê Pêroyî yê NATO’yî Mark Rutte, Zirweya NATO’yî ver yew meqaleya xo de dîyar kerdbî ke qerarê ke Zîrweyê Laheyî de amebî girewtene, do nê kombîyayîşî de berê caardene. Zîrweyê Laheyî de serê babetanê sey hemkarîya berardişê endustrîya pawitişî, xurtkerdişê paştîdayene seba Ukrayna û zordayîşê serê Rûsya, xurtkerdişê dewletanê Ewropa seba ke girêdayê Amerîka nêmanê û tehlukeyê Îranî de qerarê ke amebî girewtene; bikewê pratîk do ser o munaqeşeyî bêrê kerdene.
Demê aştîye qedîya û ganî NATO û Ewropa seba şerî amade bê!
Sewbîna meqaleya Mark Rutte de û hetê Sereka Komîsyonê Ewropa Ursula Von Der Leyen ra xeta Rûsya, Çîn û Îranî sey tehluke amebî pênasekerdene û amebî vatene ke vera nê hêzan ganî mekanîzmayê tadayî bikewê dewrê. Reyna meqale de amebî vatene ke endî wextê aştîye qedîyayo ganî Ewropa û NATO xo seba şerî amade bikerê nê esasî ser o viraştişê çekan zêde bikerê û serê xurtkerdena pawitişî de vinderê. Goreyê na meqale yeno pawene ke serê Îranî de qerarê neweyî bêrê girewtene û serê mekanîzmaya tadayî de erjnayîşî bêrê kerdene.
Tesîrê serê Kurdîstanî
Ronayîşê NATO’yî ra nat Komara Tirkîya sey qerekolêka NATO’yî yê Rojhelatê Mîyanênî de xebate kerda û goreyê menfîetê dewletanê hegemonan têgêraya. Tirkîya wazena bi zîrweyê NATO’yî destê xo xurt bikero û prosesê Aştî û Komelê Demokratîk de hem zere de hem zî teber de hîna zêde tesîr bikero. Sewbîna Serekê demkî yê Sûrîya Ehmed El Şara zî do badê zîrweyî Anqara de Serekê Amerîka Donald Trumpî reyde pêvînayîş bikero. Yeno vatenê ke no pêvînayîş do serê prosesê entegrasyonî yê Rojava û Sûrîya de bo. Badê zîrweyê NATO’yî yena pawene do çarçewaya qanûnî bêro rojdemê Meclîsî Tirkîya. Prosesê Aştî û Komelê Demokratîk ne tena Vakur, do tesîr serê çar hetanê Kurdîstanî zî bikero. Goreyê ke gamî Vakur de bêrê eştene, Rojava de zî bi eynî hawayî mîyanê hemsencî de prosesê entegrasyonî do dewam bikero. Her çiqas babeta kurdî û Kurdîstanî zîrweyê NATO’yî de rojev de nêbê zî, planê serê Rojhelatê Mîyanênî do tesîr serê Kurdîstanî de bikero. Badê zîrweyê NATO’yî mudaxaleyêke newe vera Îranî do tesîrêko gird serê Rojhelatê Kurdîstanî de zî bikero.
