Bi tewrbîyayîşê Berpirsîyarê Şubeyê Futbolî Nedîm Şîmşek û Dîrektorê Teknîkî yê Amedsporî Besnîk Hasî kombîyayîşê çapemenîye ame viraştiş. Kombîyayîş de ame vatene ke Lîgê Superî lîgêko zaf zor û zehmet o û wina ame vatene: “Ma maçê xo ya verêne keyeyê xo de vera Erziromî kay kerd. Serkewtîşê ma seba ma zaf muhîm bi û ma 3 puanê muhîmî girewtê. Ez eşkena vajî ke ma destpêkêko weş kerd. Bêguman ma nê zî zanenê ke no tena destpêkêko.”
Bi tewrbîyayîşê Berpirsîyarê Şubeyê Futbolî Nedîm Şîmşek û dîrektorê teknîkî yê Amedsporî Besnîk Hasî Otela Plaza de kombîyayîşê çapemenî viraşt. Kombîyayîş bi arayî dest pêkerd. Rayberîya Amedsporî û xebatkarê çapemenî kombîyayîş de ca girewt. Kombîyayîşê ke tede pankart û afîşê “Em tên” ameyî akerdene de, verî Şîmşekî qisey kerd û nê çîyî vatî: “1ê Temmuze de ma Erzirom de kampê xo kerde û ma 3 maçê hazirîye kay kerdî. Ma 9 transferî resnayî kampê. Roja 20ê temmuze de ma Burdur de kampê xo dewam kerde. 2 transferê ma yê neweyî zî resayî nê kampî. Badê kampî ma Amed de amadekarîyê maçê Erziromsporî kerdî. Verê lîgî ma 16 transferî kerdî û peynî de ma transferêko bîn zî kerd û ma bi temamî 17 transferî kerdî. Awankerdişê taximêke newe ra zaf zehmet o.”
‘Tesîsê ma ameyê temîrkerdene’
Nedîm Şîmşekî dîyar kerd ke transferê taximanê ke newe vejîyayê sey Amedsporî, goreyê şaristanê naskerdeyan sey Stenbolî hîna zehmet o û nê çîyî ardî ziwan: “Tesîsê ma ameyê temîrkerdene û tesîsan de tadîlatêko nêzdîyê otela 5 estareyan ame kerdene û ma do verê her deplasmanî kombîyayîşê çapemenîye virazê. Sahayêka bîne ya tesîsan de do mîyanê 20 rojan de biqedîyo û tesîsan de tena yew saha seba Amedsporî bes nîya. Ez înanê ke viraştişê sahanê ma yê tesîsan de keda înan esta sipas kena.”
‘Rayberîye seba ardîşê futbolbazan hewildayîşêko zaf gird mojna’
Besnîk Hasîyî, da zanayene ke heyetê rayberîya karanê zaf weşan kenî û gureyenî û wina qisey kerd: “Ez eşkena vajî ke rayberîye seba ardîşê kaybazanê Amedsporî bi raştî zî hewildayîşêko zaf gird mojna. Nê kaybazê ke ameyê, ganî adaptasyonê înan ê lîgî weş bibo. No helbet prosesêko zor û zehmet o û hewldayîş ke atmosferêko profesyonel awan bikerê. Tena mîyanê taximî de nê, teberê taximî de zî hewl danê ke zemînêk weş bêro afirnayene, ke no nê prosesî de çîyêko zaf muhîm o.”
‘Ganî amadekarîyêka bihêze bibo û ma zaf bixebitîyê’
Besnîk Hasîyî dîyar kerd ke Lîgê Superî lîgêko zaf zor û zehmet o û wina dewam kerd: “Ganî amadekarîyêka bihêze bibo û ma zaf bixebitîyê. Xebatê ma û endamanê heyetê rayberîye aşma hezîrane ra nata dest pêkerd û dewam kenê. Sey rayberîye her çîyo ke destê înan ra ame kerd. Sey ke mi bi Amedsporî de pêkerd, mi ra vat ke ê do bi raştî kaybazanê raştan, kaybazanê ke ez wazena û kaybazanê ke hewceyîya ma bi înan esta bigîrê. Hewl danê ke hîna zêde bixebitîyê. Mîyanê xo de nê karî weş rayra benê.”
‘Hewceyîya ma bi tayê profîlanê dîyarkerdeyan ê kaybazan zî do bibo’
Besnîk Hasîyî dewamê qiseykerdişê xo de dîyar kerd ke o seba nê wextî taximî ra razî yo û wina dewam kerd: “Bêguman zaf karî estê, zaf çîyî estê ke ganî bêrê kerdene. Ma nê zî zanê. Hewcedarîya ma bi tayê profîlanê dîyarkerdeyan ê kaybazan zî do bibo. Wa kaybazê holî bêrê ke taxim hîna zêde aver şêro. Bi nê hişî, helbet do hewceyîyê ma bibo.” ‘Eke ma sey taximî wazenê bêrê astêka baş e, game bi game şîyayîş zaf muhîm o’ Tewr peynî de Besnîk Hasîyî ard ziwan ke terefdarê Amedsporî pawenê û qiseykerdişê xo wina qedîna: “Ez nê zî zana, la hewldanêko zaf gird esto. Hetê rayberîye ra ez eşkena vajî, xebatêka başe kenê. Zaf gureyenê ke ma seba antrenmanan û lîgî amadekarîye bikerê. No helbet rewşêka zaf muhîm a. Ma maçê xo ya verêne, keyeyê xo de vera Erziromî kay kerd. Serkewtîşê ma seba ma zaf muhîm bi û ma 3 puanê muhîmî girewtî. Ez eşkena vajî ke ma destpêkêko baş kerd. Bêguman ma nê zî zanê ke no tena destpêkêko. Do perîyodêko zaf derg biancîyo. Nê warî de hazirî zaf muhîm a. Eke ma sey taximî wazenê gird bibê û bêrê astêka baş e, gam bi game şîyayîş zaf muhîm o.” Badê qiseykerdişan, Besnîk Hasî û Nedîm Şîmşekî cewab da persê rojnamegeran û kombîyayîşê çapemenî qedîya.
