Federasyonê Karkeranê Koçber ê Almanya (AGÎF) seba dawetkerdişê Berlînî serekê hukmatê demkî yê Sûrîye Colanî rexne kerd û dewleta Almanya ra waşt ke no dawet bêro betalkerdene.
AGÎF’î dawetkerdişê Colanî yê Almanya ser o eşkerayî daye. Eşkerayî de vat ke kiştoxê merdimîye yê îslamîst ê HTŞ’yî seba ke bêro Almanya hetê Hukmatê Almanya ra amebi dawetkerdene. Federasyonê Karkeranê Koçber ê Almanya (AGÎF) waşt ke no dawetkerdişê Colanî yê seba 19ê çeleyê 2026î, ganî bilez bêro betalkerdene. AGÎF’î eşkerayî de vat gonîya kurd, durzî, elewîyan ke ameyê qirkerdene hema ziwa nebîya. La Serekwezîrê Almanya Friedrich Merz xo amede keno ke Colanîyê vermendeyê DAIŞ’î bi xalîyanê sûran pêşwazî bikero.
AGÎF: Bêrê ma na hemkarîya qilêrine teşhîr û şermezar bikerê
AGÎF’î dewamê eşkarayîya xo de dîyar kerd ke serdemê nê qirkerdişan de dawetkerdişê Colanî yê seba Berlînî hemkarîyêka qilêrine HTŞ’yî reyde fîneno verê çiman. AGÎF’î dîyar kerd ke ê bi tu awayî qebûl nêkenê ke Almanya kiştox Colanî bi xalîyanê sûran peşwazî bikero.
AGÎF’î vengda heme rêxistin û kesanê averwaz ke nê zîyaretî ke do 19ê çele de virazîyo, protesto bikerê, bi taybetî tewrê çalakî bibê ke do Berlîn de bêra viraştene. AGÎF wazeno ke bi tewrbîyayîşêko gird hemkarîya Hukmatê Almanya û DAIŞ’î bêra protestokerdene.
