Kiştoxanê dewaya Nîzamettîn Kalkanî ra Şerafettîn Bayam Almanya de ame destbendkerdiş.
Şerafettîn Bayam o ke dewaya kiştişê Nîzamettîn Kalkanî ra yeno muhakemekerdiş, Almanya de ame destbendkerdiş. Ronitişê peyênî de hetê heyetê mehkema ra seba Şerafettîn Bayamî qerarê girewtişî yo bi lez amebi girewtiş û dimayê nê qerarî Şerafettîn Bayram Almanya de ame destbendkerdiş.
Goreyê malumatanê ke ameyî girewtiş, berpirsîyarê eleqedar ê Almanya do rojanê ameyox de bi rayîranê fermîyan Şerafettîn Bayramî bierşawê Tirkîya.
Se bibi?
Birayê Serekê AKP’yî yê Cizîra Şirnexî yo verên Cîhan Guvenî yê bi nameyê Tahîr Guven 4ê kanûna 2021î de encamê hêrişêko çekdarî de ame kiştiş. Wezîrê Karanê Zereyî yê ê demî Suleyman Soylu dimayê hêrişî Komîsyonê Pêroyî ya Meclîsî de Partîya Demokratîk a Şaran (HDP) kerdbî hedef û endamê Meclîsê Ciwanan ê HDP’yî Mehmet Mîraç Dînç sey berpirsîyarê hêrişî sey hedef mojnabi. Dimayê vatişê Suleyman Soylu, Mehmet Mîraç Dînç 7ê kanûna 2021î de ame destbendkerdiş û girewtiş. Emîn Kalkan zî 5ê kanûna 2021î de ame destbendkerdiş û 8ê Kanûna 2021î de ame girewtiş.
Dimayê hedefmojnayîşê Suleyman Soylu, kesê ke nasnamyê înan dîyar nêbi û nêzdîyê keyeyê Tahîr Guvenî bîyê, dimayê hedîse 20ê gulana 2022î de merkezê Cizîrî de bi çekan hêrişê Nîzamettîn Kalkan û Asim Demîrî kerd. Encamê hêrişî de Nîzamettîn Kalkanî cuya xo vîndî kerd û Asim Demîr zî birîndar bi. Bariş Şenol, Metîn Karaarslan, Rizan Bakir û Ejder Karadaş ê ke seba hêrişî û bi sucdarîya tetîkçitîye ameybî girewtiş, hema zî zîndan de yê. Dogan Guven, Ferzen Guven û Mesut Guven zî bêgirewtiş yenî muhakemekerdiş. Derheqê Îsmaîl Yavuz û Şerafettîn Bayramî de ke remaybî teberê welatî, qerarê girewtişî û bulteno sûr est bi.
