Fedarasyonê Elewî Bektaşî waştişê seba Merasîmanê Vîrardişî yê Haci Bektaş-î Velî çalakîya alternatîfî yê îqtîdarê AKP’yî pare kerd û vat: “Senî vizêr ma nê ferzkerdişî red kerd, ma ewro zî red kenê. Seba ke tu merasîmê dewlete nêeşkeno, bawerîya şarî ya raste, erkanê rayîrê û gêrayîşê heqîqetî temsîl bikero.”
Federasyonê Elewî Bektaşî (ABF) pare kerd ke Serekîya Cemxane û Kulturî yê Elewî Bektaşî hewl dano ke sazgehanê Elewîyan û Şaredarîya Hacibektaşî pasîf bikero û wazeno seba Merasîmê Vîrardişî yê Haci Bektaş-î Velî çalakîya alternatîfî virazo.
Federasyonê Elewî Bektaşî dîyar kerd ke bi telefonê înan bîyo û ê dawetê ‘Serrgêra mergî ya Haci Bektaş-i Velî’ ameyê kerdene. Federasyonî dîyar kerd ke ê bi polîtîkayanê dewlete girewtişê binê kontrolî yê dergah û cayanê pîrozan qebul nêkenê.
Vîrardişê 16,17 û 18ê tebaxe vengdayîşê beşdarbîyayîşî
Federasyonê Elewî Bektaşî dîyar kerd ke Çalakîyê Huner, Kultur û Merasîmê Vîrardişê Haci Bektaş-î Velî yê Mîyanneteweyî yê 36., yê neteweyî yê 62. do 16, 17 û 18ê tebaxe de Şaredarîya Hacibektaş û sazgehanê elewîyan reyde bi hewayêko hempar organîze bikerê. Ma vengdanê heme dergah, ocak û temsîlkaranê xo ke bêrê wayîrê cayanê xo yê pîrozan, îradeyê pêşenganê xo yê rayîrî rê ma wayîr vejîyê û vera înkar û asîmîlasyonî ma bibê yew û bêrê paştî bidê pirogramê ma. Senî ke ma her serre vanê, ma emserr zî bi vengêko hîna berz vanê ke; ma est ê, ma tîya de yê û ma do apey game nêerzê.
