Rayberê Şarê Kurdî Abdullah Ocalanî konferansê Federasyonê Cigêrayîşanê Îslamî yê Mezopotamya rê mesaj erşawit û vat: “Dîn sistemê exlaqî û cuya komelî ra ameyo dûrvistene, biyo wasitayê meşrûbîyayîşê dewlete, naye ra ruhê îslamî yê demokratîk û azadîwaz qels bîyo.”
Federasyonê Cigêrayîşanê Îslamî yê Mezopotamya (MÎA-FED) bi sloganê “Îslamo Demokratîk: Bawerî de dilsozî, komel de azadî” Salona Alî Emîrî yê Şaredarîya Şaristanê Girdî yê Amedî de konferansê xo yo gird ê hîrêyin virazeno. Konferans de mesajê Rayberê Şarê Kurdî Abdullah Ocalanî ame wendene. Kurmanckîya mesajî Emîn Ayî, Tirkîya aye zî Hatîce Şekere wend.
Mesajê Rayberê Şarê Kurdî Abdullah Ocalanî wina yo: “Beşdarê erjayeyî, bawermendê biqîymetî yê konferansê Îslamo demokratîk… Îslam cewherê xo de yew hereketê komelî y heqîqetî yo, serê erjê azadî, edalet û seypêyî komelê exlaqî û polîtîkî de ameyo ronayene. Komelo verên a Îslamî ke serekîya Hz. Muhemmedî de ameya meydan, vera tehekkumê sinifî, kolonyalîzmî û eşîrtî de, bîya yew gamêka girde ya komelê demokratîkî û aver şîya.
Cewhero azadîwaz ê komelê Îslamî hetê îqtîdarê dewletperestan ra ameyo dorpêçkerdene
La senî ke wext vîyart, no cewherê azadîwaz û komelî yê Îslamî, hetê îqtîdarê dewletperestan ra ameyo dorpêçkerdene. Prosesê ke bi Emewîyan dest pêkerdo de, dîn sistemê exlaqî û cuya komelî ra ameyo dûrvistene, bîyo wasitayê meşrûbîyayîşê dewlete, naye ra ruhê îslamî yê demokratîk û azadîwaz qels bîyo. Roja ma de hem bi îslama fermî ya dewlete, hem zî hetê mezhebperestanê ke amancê înan îktîdar o; no rayîrvejîyayîşo tarîxî bi şiklanê ciyayan yeno domnayene.
Wesîqeyê Medîne mesajê komelî yê demokratîkî yo
Mana û ferasetê Îslamo demokratîk; yeno manaya agêrayîşê erjê exlaqî, wijdanî û azadîwazanê ke cewherê îslamî de est ê. Referansanê tarîxî yê nê karî ra yewê tewr muhîman Wesîqeyê Medîne yo. Wesîqeyê Medîne, yew peymana komelî ya demokratîk e, cewherê bawerîyanê ciyayan, nasname, kultur û komelanê ciyayan pawito, ê bi prensîbanê cuya hempare ardê pêser. Bi nê hetê xo, yew modelê verên ê tewrbîyayîşê demokratîk ê tarîxê merdimîye yo.
Têkoşîno tewr gird no yo ke merdim xo reyde keno û xo vurneno
Cîhado rast têkoşînê merdimî yê vera nefsê xo yo. Têkoşînêkê domdar o ke vera meylê îqtîdarî, ez ezî, waştişê tehekkumî û heme şiklanê zulmî de yo. Têkoşîno tewr gird, têkoşînê ke merdim xo bi xo keno, xo bedilneno û reseno heqîqetî. Heta ke kultura xorexnekerdişî nêbîyo; ne azadîya şexsî ne zî ya komelî nêeşkaya virazîyo.
Ganî dîn nêbo wasitaya îqtîdarî, bibo wijdanê komelî
Prensîbê şûra ya ke Îslam de est a, yew erjê bingeyên ê komelê demokratîkî yo. Şûra yena manaya estbîyayîşê exlaqê hempar ê komelî, pîya girewtişê qeraran. Yeno manaya ke komel eşkeno rayberîye kontrol bikero. Kokê tarîxî yê sîyasetê demokratîkî, demokrasîya herêmî û cuya komunal nê ferasetî de est ê. Çîyo ke lazim o bêro kerdene o yo ke destûr nêro dayene Îslam bikewo xizmetê dewlete, îqtîdar û hêzanê sermayedaran. Ganî bi agêrayîşê cewherê xo, bikewo xizmetê komelê exlaqî, sîyaseto demokratîk û cuya azade. Dîn wa bibo wijdanê komelî, ne yê îqtîdarî. Heqîqet tena bi rêxistinbîyayîşê azad ê komelî eşkeno bêro destvistiş.
Îslamo Demokratîk cuya exlaqî esas gêno
Ferasetê ke verê azadîya cinîyan gênê, tebiatî sey objeyê tehekkumê bêhudûd vînenî û mabênê şaran de neyartî virazenê, tu wext cewherê îslamî temsîl nêkenê. Îslamo demokratîk; perspektîfê cuya exlaqî yo, azadîya cinîyan, cuya ekolojîk, hemkarîya komelî û birayîya şaran esas gêna. Bi nê hetê xo tena seba komelanê muslumanan nîyo, seba heme merdimîye yew çimeyo tewr muhîm ê şaristanîya demokratîkî ya. Vera krîzanê ke Rojhelatê Mîyanên de kûr benê, şerê mezheban, pêkewtişê neteweperestan û têkoşînê mabênê îqtîdaran de çareserî; bi qewetkerdişê hêzanê dewletperest û hegemonan nîya, bi averberdişê komelê demokratîkî ya.
Perspektîfê Îslamo Demokratîk eşkeno verê na yewe akero ke şar bi bawerîya xo pîya bi hawayêkê azad bîciwîyo
Perspektîfê Îslamê Demokratîk eşkeno verê na yewe akero ke şar bi nasnameyê xo, bi bawerîya xo û îradeyê xo yo azad bieşko pîya bîciwîyê. Ez bawer kena ke munaqeşeyê ke şima serê nê esasî ser o bikerê û netîceyê ke şima tira vejê; seba awankerdişê komelê demokratîk, cuya hempare ya şaran û seba prosesê Aştî û Komelê Demokratîk e ke ma dabî dest pêkerdene bibo destek, xebatanê şima de serkewtiş wazena.”
