Şervananê YPG û YPJ’yî verba DAIŞ’î de 134 rojan xover da û Kobanî pawitî. Badê xoverdayîşo xurtî yê YPG û YPJ’yî yê verba DAIŞî de, 1ê Teşrîna Peyêne de xeylê welatanê dinya de kurd û dostê kurdan vejîyayê kuçeyan û hetkarî daye Kobanî.
11 serrî ra ver dinya de, zafêrê 40 welatan de, şar seba Kobanî vejîya kuçeyan û bi yew vengî vat “Bijî Berxwedana Kobanî / Biciwîyo Xoverdayîşê Kobanî”. Dima ke 1ê Teşrîna Peyêne de xeylê welatanê dinya de şar seba Kobanî vejîya kolanan, na roje sey Roja Kobanê ya Dinya yena pîrozkerdene.
DAIŞ 14ê Êlula 2014î de hêrişê Kobanî kerd, waşt bi hetkarîya Hukmatê AKP’yî Kobanî îşxal bikero. Verba nê hêrişan de şervananê kurd, 134 rojî vera DAIŞ’î şer kerd. Şero çetin de, şervanan hêrişê DAIŞ’î şikit û DAIŞ çin kerd. Nê têkoşîn û xoverdayîşê şervananê kurd bala heme dinya ant. Vengdayîşê wayîranê Xelata Aştî ya Nobelî, akademîsyen, roşnvîr, nuştox û rexistinanê komelî yê demokratîke, 1ê Teşrîna Peyêne de sey Roja Hetkarîya Dinya ya bi Kobanî reyde ame îlankerdene.
Şervananê kurd şerê Kobanê de nîşan da ke îradeyê merdimî demo ke bi eşqê azadîye reyde bibo yew, tu çek, tu qelem û tu dişmenî nêeşkenê verê serkewtişî bigîro. Bi nê xoverdayîşê şervananê kurd, şaranê dinya 1ê Teşrîna Peyêne de heme kolananê dinya de sloganê “Bijî Berxwedana Kobanî – Biciwîyo Xoverdayîşê Kobanî” vat. Şervananê YPJ û YPG’yî, na roje ra pey derbeya girane daye DAIŞ’î ro û xoverdayîşê xo dinya rê vila kerd.
