Şaredarê berê yê navçeya Elkê yê AKPî Habîb Aşan bi pereyê dewletê otel çêkir û piştre heman otelê bi 95 mîlyon lîreyan firote dewletê.
Di 23 salên desthilatdariya AKPê de ji bilî pêkanînên AKPê yên dijî hiqûq û demokrasiyê, tişta herî balkêş dewlemendbûyîna endamên AKPê ye. Her kesê/a ku di asta jor de di nava AKPê de cih digire piştî demeke kin bi dek û dolaban dewlemend dibin. Yek ji van kesan jî şaredarê berê yê navçeya Elkê ya Şirnexê Habîb Aşan e. Habîb Aşan ê AKPî piştî ku di hilbijartinên 31ê Adara 2019an bû şaredar ji nişka ve bû dewlemendekî herêmê.
Germav dan şaredar Habîb Aşan
Habîb Aşan piştî bû şaredarê Elkê di destpêkê de bi karsazekî ji Elkê re bû şirîk û piştre hema bêje hemû karên fermî li ser navê kesê pêre bûye şirîk pêk anî. Habîb Aşan destpêkê Germava Zumrutê ya li Elkê desteser kir. Çima em dibêjin desteser kir, ji ber ku çêkirina germavê bi alîkariya DÎKA, Walîtiya Şirnexê û Şaredariya Elkê hat çêkirin. Lê di dema çêkirinê de Habîb Aşan ji Walitiya Şirnexê dibêje ‘Ger hûn germavê bi temamî nedin Şaredariya Elkê, pereye ku me soz daye em ê nadin.’ Li ser vê yekê demeke dirêj çêkirina germavê tê rawestandin û heya ku Walîtiya Şirnexê biryara firotina germavê dide.
Cerdevan û leşker nobedariya germava şaredar dikin
Di Tîrhema 2023an de ji aliyê Walîtiya Şirnexê ve îhaleya firotina Germava Zumrutê pêk hat. Habîb Aşan û şirîkê wî Azîz Yalçin bi 15 mîlyon TL germava ku 26 avahî û 6 hewzên avê têde ne kirî. Li ser vê yekê şêniyên gundê Germavê bertek nîşanî firotina Germava Zumrutê dan û nexwestin bikaranîna germavê bikeve destê Habîb Aşan û şirîkê wî. Li ser bertekên gel demek dirêj germav nehat bikaranîn. Piştî bertekên gelê herêmê, Habîb Aşan ji bo germavê bikar bîne dest bi dek û dolaban kir. Habîb Aşan bi awayek fermî Germava Zumrutê bi kirê da serhengek (albay) teqawît ê ji Enqereyê û li ser navê wî xwest germavê bi kar bîne.
Dema ji bo lêkolînê me berê xwe da navçeya Elkê û em çûn ser Germava Zumrutê, me li wir dît ku 2 cerdevan di bin xizmeta germava Habîb Aşan de ne û leşkerekî pispor ku niha li Elkê li ser peywirê ye karê serhengê germav kirê girtiye dike. Li gor agahiyên me bi dest xistine Habîb Aşan bi awayek fermî 10 salan bikaranîna germavê daye vê fermandarê ji Enqereyê û ev fermandar bêyî ku rojekê pê li axa Elkê bike, dê mîlyonan pere, bi rêya Habîb Aşan bi dest bixe.
Mijar xwarina pereyan be Habîb Aşan heye
Fêl û fanên Habîb Aşan û şirîkên wî tenê ne li ser germavê pêk hatine. Endamtiya AKPê ji bo rê û rêbazên nelirêtî û derveyî qanûnî bes e û ev yek mixabin dibe bingeha xwrina pereyê neheqî. Endamên AKPê ji aliyê xwarina pereyê neheqî ewqas pêş ketine ku, bi pereyên dewletê projeyan çêdikin û van projeyan piştre difiroşin dewletê û welatiyan.
Ji kîsê Wezareta Çandê otel çêkir û firot Wezareta Perwerdeyê
Habîb Aşan û fîrmaya bi navê Îmamoglû Yalçinlar di sala 2023an de serî li Wezareta Çand û Turîzmê dan û xwestin otelekê çêbikin. Li ser vê daxwaza Habîb Aşan û şirîkê wî wezaretê serlêdana wan qebûl kir û %75ê otelê bi pereyê wezaretê hat çêkirin. Habîb Aşan û fîrmaya bi navê Îmamoglû Yalçinlar di sala 2025an de çêkirina otelê xelas kir û piştre dest bi bikaranîna otelê kirin.
Piştî demeke Habîb Aşan têkiliyên xwe yên nava rayedarên AKPê bikar anî û otela ku bi pereyên Wezareta Çandê û Turîzmê çêkiriye di dawiya sala 2025an de bi bihayê 95 mîlyon lireyan firot Wezareta Perwerdehiyê. Niha Wezareta Perwerdehiyê otelê weke Mala Mamosteyan a Elkê bikar tîne.
Qanûn ji bo Habîb Aşan derbasdar nîn e
Li gor qanûna dewletê, projeyek bi hîbeya dewletê were çêkirin divê ji aliyê kesê/a çêdikeve herî kêm 5 salan were bikaranîn. Heya ku 5 sal temam nebin ev projeya bi pereyên dewletê hatiye çêkirin nayê firotin. Lê dema xwediyê van projeyan AKPiyên weke Habîb Aşan bin, qanûn ji bo wan derbasdar nîn e. Hê 5 salên çêkirina projeya otelê temam nebûye, Habîb Aşan û firmaya Îmamoglû Yalçinlar ev qanûn binpê kirin û otel firotin.
Sibe: HESên ewlehiyê firotin serokê AKPî Rahmet Taşar
