Îdareyê Pêroyî yê Mektebanê Kobanî dîyar kerd ke rîyê hêrişanê grûbanê hukmatê demkî yê Sûrîye ra bi hezaran koçberî kewtî Kobanî û mekteb û cayanê bînan de bi ca bîyî û 72 hezar wendekarî heqê xo yê wendişî ra bêpar mendê.
Hêrişanê ke 6ê çeleyî ra Heleb de dest pêkerdbî resaybî Kobanî û 20ê çeleyî ra Kobanî heme hetan ra binê dorpêçî de ya. Şarê dewanê Kobanî koç kerd merkezê Kobanî û mekteb, camî, baxçeyanê tutan, nêweşxane û keyeyan de bi ca bîyî, tayê keyeyan de heta 6 keyeyî pîya ciwîyenê.
Îdarekaranê Mekteban ra Ezîze Îsmaîl ke ajansê ANHA’yî rê qisey kerd, wina vat: “Ganî 25ê çeleyî de nêmserra dîyine dest pêbikerdêne la rîyê hêrişan ra heme wendekarî wendişî ra dûrî mendê. Kantonê Firatî de 572 mektebî ameyê girewtene û 72 hezar wendekarê Lîse, Mîyanên û Amadeyî wendişî ra bêpar mendê.”
Ezîze waşt ke dorpêçê Kobanî bêro hewanayene û peymana mabênê HSD û hukmatê demkî bêrê caardene ke koçberî apey agêrê û mektebî bêrê akerdene.
