Endamanê Yewîya Ewropa Bruksel de Îlham Ehmed û Rohilat Efrîn goştarî kerdî. Pêvînayîş de temînatê heqanê kurdan, problemê asayîş û agêrayîşî yê Efrînî, tehdîtê DAÎŞî û rolê garantorîya Yewîya Ewropa ameyî destgirewtene.
Hemsereka Daîreyê Karanê Teberî yê Rojawanî Îlham Ehmed û Endama Fermandarîya Pêroyî ya YPJ’yî Rohilat Efrîn ke Parlamentoyê Ewropa de kombîyayîşê çapemenîye kerd, dima ra parlameteranê Ewropa rê qala rewşa Rojawanî û waştişanê xo kerd.
Qiseykerdişê akerdişê konferansî endama Parlamentoyê Ewropa Evîn Încîr kerd. Încîr vat entegrasyon muhîm o la ganî heqanê kurdan rê hurmet bêro kerdene.
Îlham Ehmed: Temînatê Qanûnê Bingeyî hewce keno
Îlham Ehmed ke qala rewşe û waştişanê kurdan ê Sûrîye kerd, vat ganî heqê kurdan Qanûnê Bingeyî de bêrê garantîkerdene Îlham Ehmed bale ante têkoşînê kurdan ê vera DAÎŞ’î ser û vat ganî kurdî înşayê Sûrîyeya nêwî de tayêna hêzdar ca bigê û semedê nê zî îtîfaqê ci paştî bidê ci.
Îlham Ehmed vîst vîrî ke telukeyê DAÎŞ’î hema dewam keno û vat nê semedî ra ganî entegrasyon û cakerdişê leşkerî raşt bêrê kerdene.
Îlham Ehmed ard ziwan ke semedê perwerdeyê kurdkî di saetan qebul nêkenê û vat no ganî sey heqêkê bingeyî, Qanûnê Bingeyî de ca bigêro.
‘Efrîn ganî hetê efrînîjan ra bêro îdarekerdene’
Îlham Ehmed îfade kerd ke derheqê peyser agêrayîşan de problemî est ê û vat: “Hema hendê 50 hezar efrînijî macîr ê, çend rey erdê xo ra bîyî. Ganî asayîş û îdare destê efrînijan de bo. La na babete hema game nêameya eştene.”
Îlham Ehmed ard ziwan ke ganî kurdî mîyanê dewlete û wezîrîyan de ca bigêrê û vat Rojawan de zî ganî îdareyê herêmî û asayîş bibo.
‘Ganî Yewîya Ewropa semedê kurdan bibo garantor’
Îlham Ehmed îfade kerd ke semedê vergirewtişê qirkerdişan û mîyanê hukmatê Şamî de cagirewtişî û kurdê û şarê bînî Qanûnê Bingeyî de bêrê naskerdene, bi herême de çimdarîkerdiş garantorîye hewce kena û veng da Yewîya Ewropa.
Rohilat Efrin zî ard ziwan bi ê bi zîhnîyetê radîkalî rî bi rî yê û vat: “Seba ke garatîya ma çîn a, ma binê tehlukeyê hêrişan de yê. Ganî heqê cinîyan pêt bêrê pawitene. YPJ semedê pawitişê cinîyan her cade modelêk o. Tehlukeyî dewam kenê garantorîye rê hewce kena. Eke no bibo, YPJ do warê sîyasî û asayîşî de rolê xo bîyaro ca. Yewîya Ewropa ganî na babete paştî bido.”
Îlham Ehmed û Rohilat Efrîn persê endamanê parlamentoyî zî cewab kerdî.
Yewîya Ewropa ameye rexnekerdene
îlham Ehmed îfade kerd ke Kobanê de rewşa merdimî giran a, semedê wedaritişê ablûka pêvînayîşî dewam kenê û vat semedê pawitişê kurdan ganî mekanîzmayêka mîyanneteweyî bêro ronayene. Reyna vat ê sîstemê ademî merkezî wazenê la no hema nêameyo qebulkerdene û seba ke Rojawan dir têkîlîye nêna ro, Yewîya Ewropa rexne kerd.
‘Tehlukeyê DAÎŞ’î dewam keno’
Rohilat Efrîn zî ard ziwan tehlukeyê DAÎŞ’î dewam keno û vat yeno vatene ke DAÎŞijê ke kampan de bî kewtî mîyanê artêşe û coka zaf qesawet kenê. Efrîn seba ke kurdî mîyanê hukmatê demkî de nêameyî cakerdene hêrsê xo ard ziwan û vat nê prosesî de berpirsîyarîya tewr pîle wayîrvejîyayîşê destkewteyan o.
