Wendekara masterî ya Heqnasîye ya Unîversîteya Rojava Arîne Mihemed destûrê Sûrîye yê neweyî de seba pawitişê heqanê kurdan vengdayîşê ronayîşê komîteyêka huqûqîye kerd û vat ke ganî heme huqûqnas û zanayî qanûnê pawitişê heqanê kurdan pêşnîyaz bikerê.
Badê peymana 29ê çeleyî ke bi mabênkarîya Amerîka û Fransa mabênê temsîlkaranê kurdan û hukmatê demkî de ameye îmzakerdene, goreyê peymane hêzê hukmatê demkî do nêkewê herra kurdan, sazgehê kurdan do wezîfeyê xo dewam bikerê û koçberê Efrîn, Serêkanî û Helebî do reyna agêrê waranê xo. Eynî wext de destûrê Sûrîye yê neweyî de heme heqê kurdan do bêrê garantîkerdene.
Mihemede îfade kerd ke çarçeweya peymane de gamê eyinî yenê eştene la hema nezelaltîye zaf a û vat: “Nê 14 serranê peyênan de zaf kay û planş vera ma virazîyayî û zaf hêzan bi namayê cîya cîyayan ma reyde şer kerd. La hemverê ney de xoverdayîşêko gird vejîya meydan û şar bi hêvî û bawerîya xo serkewt. Ganî sey nê 14 serran ma xo, hêzê xo û rayberîya xo ra bawer bikerê.”
Mihemede vat ke nuştişê destûrê neweyî de beşdarîya komîteyêka huqûqîye ya kurdan hema zelal nîyo û dewam kerd: “La ganî ma nika mîyanê xo de komîteyêka huqûqîye awan bikerê ke heme huqûqnas û zanayê Rojawanî tede ca bigîrê. Ganî nê huqûqnasî qanûnê pawitişê heqanê kurdan pêşnîyaz bikerê.”
