Enstîtuya Cigêrayîşan a Kurdkî ya Almanya 21ê sibate Roja Ziwanê Dayîke pîroz kerd û vengda her kesî ke seba ke ziwanê Kurdkî vîyaro azanê neweyan wezîfeyê xo yê netewî bîyarê ca.
Enstîtuya Cigêrayîş û Zanistan a Kurdkî ya Almanya seba ’21ê Sibate Roja Ziwanê Dayîke ya Dinya’ eşkerayîyêka nuştekî weşanaye.
Eşkerayî de ame vîrardene ke UNESCO’yî na roje serra 1952î de seba vîrardişê wendekaranê ke Bangledeş de seba ziwanê xo yê dayîke cuya xo vîndî kerda, îlan kerdo. Ame dîyarkerdene ke na roje bale ancena ziwanan ser o ke vera çinbîyayîş de yê.
Eşkerayî de ame vatene ke dinya de zafêrî 6 hezarî ziwanî est ê nêzdîyê 2500î înan ra vera çinbîyayîşî de yê. Enstîtu da zanayene ke Tirkîya de 18 ziwanî binê tehluke de yê. Înan ra yew zî lehçeya Kurdkî kirmanckî ya.
Dewamê eşkerayî de ame dîyarkerdene ke ziwanê Kurdî bi serran vera înkar û qedexeyan estbîyayîşê xo pawito û ame vatene ke seba ke ziwan biciwîyo, ganî cuya rojane de, perwerde, kultur û zanist de bêro şuxulnayene.
Enstîtu waşt ke xebitnayîşê ziwanî kurdkî heme waranê cuye de bibo û perwerdeyê bi ziwanê dayîke sey heqêko bingeyin bêro naskerdene.
