Rêxistina DBP û DEM Partî yê Ebexî seba baleantişê hêrişanê vera Rojavanî rayîrşîyayîşêk oraganîze kerd û mesajê piştîdayîşî da. Eşkerayîye de ame vatene: “Zerrîya ma Rojawan de dana piro.”
Şarê Ebexî bi pêşengîya rêxistinê DBP û DEM Partî yê qezaya Ebexê ya Wanî vera hêrişanê qirkerdiş ê Rojavanî rayîrşîyayîş organîze kerd. Rayîrşîyayîşî de pankarta “Rojavan xeta ma ya sûr a” ameye akerdene û dovîzê “Jin jiyan azadî” ameyî girewtene. Rayîrşîyayîşî de sloganê “Bijî berxwedana Rojava”, “Rojava Rojhilat e, Kurdîstan yek welat e” û “Rojavan rûmetê ma yo” ameyî eştene.
Hemserekanê DBP û DEM Partî yê Wanî, parlemanter Zulkuf Uçar, hemşaredarê Bajarê Girdî yê Wanî Abdullah Zeydan û zaf hemwelatîyî beşdarê rayîrşîyayîş û eşkerayîye bîyî.
Selam da Rojawan û Rojhelatî
Hemsereka DBP’yî Gonul Uzunaye qisey kerd û dîyar kerd ke şarê kurdî bi rojan o ke vera hêrişanê qirkerdişî xoverdayîşêko xurt dano û planê qirkerdişî pûç keno. Uzunaye vat: “Senî ke şarê kurdî û enternasyonalîstan serra 2014î de Kobanê kerd gorîstanê DAÎŞ’î, ewro zî Kobanê xover dano. Pergala ke Rojavan de ameye awankerdene seba dinya bîye nimûne. Senî ke qehremanan serra 2014î de DAÎŞ bin vist, ewro zî şarê kurdî û ciwanê înan Rojawanî kenê gorîstanê nê zîhnîyetê lêminî.”
‘Colanî ra vanê bira’
Uzunaye wina qedînaye: “Prosesê Haştîye û Komelê Demokratîkî 27ê sibate de bi vengdayîşê Abdullah Ocalanî dest pêkerd. La ewro Tirkîya Colanî ra vana ‘birayê mi’. Ma venga Tirkîya danê; wa verê ci birayê to û wayê to kurdî bibê. Eke ma do haştîye bikerê, şima zî ganî kurdanê Rojavanî nas bikerê. Rojavan xeta ma yê sûr a. Pawitişê destkewteyanê kurdan pawitişê rûmetê însanan o.”
