Konseya Emnîyetî ya Netewanê Yewbîyayeyan (NY) bi rojeva Sûrîye kombîyayîşêk viraşt û venga hetanê Sûrîye da ke goreyê adirbestî hareket bikerê, sîvîlan bipawê û bi hewayêko cîdî beşdarê dîyalogê sîyasî bibê.
Cagîrê Sekreterê Pêroyî yê NY’yî Xalîd Xiyarî derheqê netîceyanê kombîyayîşî de qisey kerd û dîyar kerd ke rewşe hema zî têmîyan a. Xiyarî ard ziwan ke tayê beşanê Heseke û dorûverê Kobanê de hêriş û pêkewtişî dewam kenê û netîce de bi des hezaran kesî koçber bîyî û kişîyayî û birîndarî est ê.
‘Rewşêka zaf têmîyane est a’
Xiyarî dîyar kerd ke ganî adirbestîya 18ê çeleyî bêra caardene û seba pêardişê qewmîyayîşanê peyênan ê mabênê hukmatê demkî yê Sûrîye û HSD’yî beşdarîyêka cîdîye biba. Xiyarî venga heme alîyan da ke sîvîl û binyadan bipawê û rayîr bidê ke hetkarî bêasteng bivîyarê.
Rûsya: Ganî binpaykerdişî vinderê
Xiyarî ard ziwan ke kombîyayîşî de Sûrîye de seba estbîyayîşê çekdaranê xerîbanê hîşyarî ameye kerdene û vat: “Temsîlkaranê Rûsya ard ziwan ke ganî binpaykerdişî vinderê û dîyalogî bêrê peydakerdene. Temsîlkarê Amerîka seba cehdkerdişanê têkoşînê vera terorî û entegrasyonê Vakur û Rojhelatê Sûrîye piştîya xo nîşan daye.”
