Bangîn Heleb ke xoverdayoxanê vera çeteyanê Şêxmeqsûdî ra yew o, vat ke Heleb de hêrişkarî çeteyê DAÎŞ’î bîyî.
Bangîn Heleb ke endamê Hêzanê Asayîşê Zereyî yo û taxanê Şêxmeqsûd, Eşrefîye û Benî Zeydî de bi rojan vera grûbanê çeteyan ê HTŞ’yî şer kerd û netîceya bombardumanê teyareya bêpîlote ya çekdare de birîndar bî, ANHA rê qisey kerd.
Bangîn Helebî îfade kerd ke grûbanê ke hêrişê taxan kerd yê dewleta tirke û çeteyê DAÎŞ’î bîyî: “Nîşan û beyraqê ke milê înan de bî, yê DAÎŞ’î bî. Ma înan nas kenê, bi serran o ma vera înan şer kenê. Hêrişê bêrehm kerdî.”
Goreyê vatişanê Bangîn Helebî grûbê hêrişkaran ‘Artêşa Neteweyî’ nêbî: “Kargehê şarî talan kerdêne, cenazeyê çeteyan erd de bî, cesedê xo erd ra nêgirewtêne, erebeyî diznayêne. Nê pratîkê DAÎŞ’î yê.”
Bangîn Helebî vat ke 300 cenazeyê nê çeteyan erd de est bî û çeteyan nê melumatî raya pêroyî ra nimitî.
Bangîn Helebî bale ante hêrişanê ke Nêweşxaneyê Xalîd Fecîrî ser o bîyî: “Nêweşxane ser o bi tankan hêriş kerd, mermîyê tankan dêsanê nêweşxane ro ginayî. Nêweşxane de hûmara sîvîlanê birîndaran zaf bî, dermanê ke ameyî temînkerdene seba sîvîlan ameyî şuxulnayene.”
Bangîn Helebî vat ke grûbê çeteyan çimeyê awe yê nêweşxane ser o zî hêriş kerd û qeyd kerd ke çeteyî tena yew teyaraya bêpîlote ya çekdare reyde ney, tayê bombekaranê întîharî û yê bînî zî 6-7 teyarayê bêpîlotî yê dewleta tirke ke sey “Bayraktar” yenê zanayene, hêriş kerdî.
Bangîn Helebî bi vatişê “Hêrişanê hewayî de tankî ameyêne ver bi nêweşxane û sey hêzanê asayîşî ma çend tankî îmha kerdî” qiseyê xo temam kerdî.
