Rojnameger Denîz Firat, serrgêra şehadetê xo de, bi eşkerayîyêk, Mexmûr de ameye vîrardene. Eşkerayî de mesejê “Qelem û kameraya heqîqetî do çirey erd de nêmanê” ame dayîş.
Rojnameger Deniz Firat (Leyla Yildiztan), ke serra 2014î de, wextê hêrişanê DAIŞ’î yê vera Şengal û Mexmûrî de cuya xo ra bîbî, serrgêra şehadetê xo de, Mexmûr de, bi çalakîyêka ke hetê rojnamegeran û şarê kampê Mexmûrî ra ameybî organîzekerdene, ameye vîrardene.
Serra 2014î de, DAIŞ’î Îraq û Sûrîye de, dest bi hêrişanê giranan kerdbi; 3yê tebaxe de Şengal û 6ê tebaxe de Kampê Koçberan ê Şehîd Rûstem Cûdî (Mexmûr) ser o hêriş kerd. Rojnameger Denîz Firat, wexto ke agahîyê hêrişênê DAIŞ’î û xoverdayîşê şarê Mexmûrî resnayêne raya pêroyî, 8ê tebaxa 2014î de hêrişê DAIŞ’î de cuya xo ra bîye.
Çalakîya vîrardişê serrgêra şehadetê aye de, seba vîrardişê kesanê ke têkoşînê azadîye de cuya xo ra bîye, rêze ameye girewtiş. Badê rêzgirewtişî, Farqîn Kara eşkerayî wend.
‘Tarîxê çapemenîya azad bi bedêlan ameyo awankerdene’
Eşkerayî de ame dîyarkerdene ke çapemenîya azad tena resnayîşê xeberan ra sînordar nîyo, eynî wextî de perçeyêk têkoşînê pawitişê estbîyayîşê komelî, rûmetê merdimîye û heqîqet o. Ame îfadekerdene ke tarîxê çapemîya azad ê kurdan, bi bedêlanê giranan ameyo awankerdene, Apê Musa ra hetanî Gurbetellî Ersoz, Gulîstan Tara, Azîz Koyuoglu, Seyîd Evran, Hêro Bahadîn, Nazim Daştan, Cîhan Biîlgîn, Egîd Roj, Murad Mîrza, Nûjîyan Erhan û Denîz Firat ameyo awankerdene. Eşkerayî de wina ame vatiş: “Rojnamegerê şert û mercanê tewr giranan de kameraya xo sey çekê heqîqetî xebitnenê û rûmetê rojnamegerîye pawenê.”
‘Ma do herinda înan ser o bi’
Eşkerayî de bale ame antiş ke Denîz Firat, tutitîye ra têkoşînê heqîqetî domnayo. Ame îfadekerdene ke aye bi hawayêko serwext “Qelem û kameraya heqîqetî çirey nênê şiknayîş” têkoşîn kerdbi û awankerdiş û averberdişê çapemenîya azad ê Mexmûrî de rolêko gird girewtbi.
Peynîya eşkerayî de, kedkaranê çapemenîya azad, dîyar kerd ke ê do têkoşînê Denîz Firat û heme rojnamegeranê ke cuya xo ra bîyî bidomnê û mesajê, “Qelem û kameraya heqîqetî do çirey erdî de nêmanê, ma do herinda înan ser o bi” da.
Çalakîya vîrardişî bi sloganê “Bijî Serok Apo”, “Şehîd namirin” û “Jin, jîyanû azadî” qedîyaye.
