Ziwanzan Hamît Şarlo aşkera kerd ke wa Tirk, Ecem û Ereb serdestî zî ra fek veradê, demo ke fek veradayê no demî ê eşkenê vajê, birayî yewbînan ê û dîyar kerd ke ê pey Îmrali yanî birêz Ocalanî de yê.
28ê Kanûne de DEM Partî ra heyeto ke Pervîn Buldan û Sirri Sureyya Onderî ra yeno pê Îmrali de Rayberê PKK’î de de pêvînayîş kerdbî. Peynî zî Heyet de Ahmet Turk zî ca girewt û heyet pêşnîyazê Rayberê PKK’î Abdullah Ocalan ser yew bi yew partîyê sîyasî gêreno. Derheqê pêvînayîşê bi Rayberê PKK’î, dormeyê tewir bi tewir ra pêvînayîşan yeno kerdiş. Ziwanzan Hamît Şarlo zî pêvajoyêk destpê kerda ser ajansê ma rê qise kerd.
Ziwanzan Hamît Şarlo vat ke o vernî de silam û hurmetê xo erşeweno Îmraliyî û mîlletê Kurd ra û wina vat: “Nika pêvajoyêk destpê kerda, ma bawerîya dewlete nêkenê. Çimkî dewlet wazena her tim ma bixapêno, ma rê dehfikan rono. Na ray ma xo rê bawerî, dewlete ra bawer nîyê. Ma raşt bi raşt heqê xo ziwanî, nasnameyî, însaneyî û seyyewbînaye wazenê. No ser ma hadre yê, ma zaf berdel dayê û berdel zî danê. Pêvajoyêk destpê kerda, seba însaneyî çîyo, wa a bêro ca. Seba heme mîlletan çi lazim o, ma Kurdan ra zî o lazim o. Seba însaneyî çi lazim o, ma a wazenê. Ma wazenê welatê xo de serbixo cuye bikerê.”
Ma pey birêz Ocalanî de yê
Şarlo bal ant ser tersê dewlete yê cîyabîyayişî rê û wina domna: “Ma cîyabîyayişî weş û ca de nêvînenê û çimê ma zî çîn o. Ma pîya cuye wazenê, welatî ke ma cuyenê, ma hemin rê bes o. Ma însaneyî ra kêm mendê, wa Tirk, Ecem û Ereb serdestî zî ra fek veradê, demo ke fek veradayê no demî ma eşkenê vajê ma birayî yewbînan ê. Ma vatişê birayî yê vengî qebûl nêkenê, na tewir birayî tena serdestî ya. Ma wazenê na pêvajo serbikewa, ma destek danê no heyetî ra û ma pey Îmrali yanî birêz Ocalanî de yê. Çimkî ma Abdullah Ocalan, rayberê xo qebûl kerdê, dinya û alem zaneno Rayberê ma, Serek Ocalan o.”
