Hemserekê Meclîsê Pêroyî yê Taxanê Şêxmeqsud û Eşrefîye Nûrî Şêxoyî dîyar kerd ke hêrişê taxan ser o bi piştgirî û hetkarîya Tirkîya dest pêkerdê û vat: “Amancê hêrişan; vengkerdiş û îşxalkerdişê taxan o. Seba ke ma taxanê xo mîyanê dorpêç û hêrişan ra vejê, pêvînayîşê ma dewam kenê.
Grûbê paramîlîter ê girêdayeyê Tirkîya û hêzanê HTŞ’yî 27ê kanûne de hêrişê taxanê Şêxmeqsud, Eşrefîye û Benîzed ê girêdayeyê Helebî kerd. Heme hîrê taxî ameyê dorpêçkerdene û 5 saaetî bêmabên bi çekanê giran, tang û topan hêrişê vera taxan dewam kerd. Dima ke hêzê koalîsyonî kewtê mabên hêrişî vindertê. Her çend hêrişê vera taxan amebo vindertene zî ceyranê taxan zî ameyo birnayene. Hemserekê Meclîsê Pêroyî yê taxanê Şêxmeqsud û Eşrefîye Nûrî Şêxo ke ajansê ma rê qisey kerd, dîyar kerd ke amancê hêrişan vengkerdiş o û seba hewanayîşê dorpêçî pêvînayîşê înan dewam kenê.
‘Bi tang û topan hêriş kenê’
Nûrî Şêxoyî îfade kerd amancê hêrişan îşxalkerdişê taxan o û wina vat: “Taxê Helebî Şêxmeqsud, Eşrefîye û Benîzed ke temsîlkarê înan zafane kurd ê û mîyanê ci de kêm bibê zî ereb û temsîlkarê bînî zî est ê, bi hewayêko hovane yenê bombakerdene. Amanc îşxalkerdişê nê taxan o. Bi nê hewayî wazenê kurdan Heleb ra vejê. Nê hêrişî bi piştgirî û hetkarîya Tirkîya dest pêkerdê. Çeteyê derûdorî heme hîrê taxî dorpêçkerdeyî, bi çekanê giran, tang û topan hêriş kenê. Destê medyaya hukmatê Şamî û MÎT’ê tirk zî mîyanê nê hêrişan de est a. Hêrişo ke 5 saetî dewam kerd, ame kerdene. Waştêne ke qirkerdişêko gird bikerê. Vera 5 hezara merdiman şerêk da destpêkerdene. Ma waşt bi dîyalogî çareser bikerê bi şer nê. Şarê Şêxmeqsud, Eşrefîye û Benîzed hêzê asayîşê pawitişê taxan kerd. 25 welatîyê taxe birîndar bîyê û cinîyêk zî cuya xo vîndî kerde.”
‘Ma nêeşkenê pêvînayîşan de biresê encamêk’
Nûrî Şêxoyî îfade kerd hukmatê Şamî goreyê sozanê ke dano tênêgêreno û wina qisey kerd: “Hêrişan ra pey seba vindarnayîşê hêrişan pêvînayîş zî ame kerdene. Hêzê garantorî sey Amerîka, Fransa û dewletanê ereb kewtê mîyanê cehdan ke hêrişan vindarnê. Encam de şer vindert. Hukmatê Şamî qels û bêîrade yo. Grûban ra ameyo pê. Seba ney zî ma bawer nêkenê ke çareserîyêk bivînê. Rejîmêko dînperest Sûrîye rayra beno, îqtîdaer û zilimkar o. Nê semedî ra zî ma nêeşkenê pêvînayîşan de biresê encamêk. Sozî yenê dayene, qebul kenê la pratîkî de eksê ci têgêrenê û hêriş kenê.”
‘Şarî tehdît kenê ke taxan vemg bikerê’
Nûrî Şêxoyî dîyar kerd ke hukmatê demkî yê Şamî zafêrê 5 aşmî yo ke amadekarîya hêrişan kerdo û vat: “Rayîrê taxan girewtê. Heme hîrê taxî dorpêç kerdê û berê taxan zî bi kerreyan girewtê. No mojneno ke wazenê probleman bi hêrişan û goreyê çareser bikerê, bi dîyalogî ney. Hukmatê demkî yê Şamî wazeno taxanê kurdan veng bikero. Derûdorê Şêxmeqsud û Eşrefîye de 2 taxî suryanan est ê. Nê her di taxî binê kontrolê hukmatê Şamî de yê. Welatijê ê taxan keyeyanê înan ra vetê û înan ra vato riyê hêrşan ra tîya bi tehluke yo. La rastîye de wina nîyo. Rastîye de planêko lêmin est o. Dîmenan de zî vejîya orte ke kewtê zereyê keyeyê înan û çîyê înan tirawitî.”
‘Ganî heme kurdî bibê vengê Şêxmeqsûd û Eşrefiye’
Nûrî Şêxoyî dîyar kerd ke taxê kurdan mîyanê dorpêçî de yê û şar nêeşkneo bireso laizmtîyanê bingeyîn. Nûrî Şêxo seba ke zor bidîyo hukmatê Şamî waşt heme kurdî wayîrê Şêxmeqsûd û Eşrefiye vejîyê û wina vat: “Şarê Şêxmeqsûd û Eşrefiye wayîrê îrade û fikro azad ê. Nê esasî ser o xo rêxistin kerdo. Bi rojan o mîyanê pawitişo rewa de yo. Şer de zî şar û asayîş bi yew û nê hêrişî vindarnayê. Çeteyî nêeşkenê tu çîyêk zî bidestfînê. No şaro xoverdayox nêverda ke ê biresê amancê xo yê îşxalkerdişê taxan. Do tu wext nêeşkê biresê amancê xo. Taxans er o heme çî ameyo qedexekerdene. Werd û şimitişî ra bigîre heta şewatî asteng kenê. Ganî heme kurdî bibê vengê Şêxmeqsûd û Eşrefiye.”
‘Bi destê Tirkîya nê hêrişî yenê kerdene’
Nûrî Şêxoyî vat ke seba çareserîya prpblemî pêvînayîşê înan hukmatê Şamî reyde dewam kenê û wina dewam kerd: “Dewletê garantor sey Amerîka û Fransa seba adirbest bêro kerdene û şer dewam nêkero kewtê mîyanê cehdan Rayberîya Xoser û rayberîyê taxan zî mîyanê pêvînayîşan de yê. La îradeyê hukmatê Şamî çin o. La Heleb sey Şamî nîya. Heleb zafane binê kontrolê Tirkîya de ya. Ê telîmatan danê grûbanê çete. Seba ke ma çareserîyêk bivînê û şer dewam nêkero cehdê ma dewam est ê. Tirkîya Heleb de tesîrdar a û bi destê Tirkîya nê hêrişî yenê kerdene. Seba ke ma heme hîrê taxan mîyanê dorpêçî ra vejê pêvînayîşê ma dewam kenê.”
