Serekê DEVA, Gelecek Partî û Saadetî yê Amedî dîyar kerd ke ganî bi lez meseleyê Kurd bêro çareserkerdene û vatê ke ê do paştî bidê heme gama ke do bêra eştiş.
Parlementerê Partîya Têdûştî û Demokrasîyê ya Şaran (DEM Partî) Pervîn Bûldan û Sirri Sureyya Onder 28ê Kanûne de bi Rayberê PKK’yî Abdullah Ocalanî reyde pêvînayîşêk kerd. Pêvînayîşî ra pey 7 nuqtayê ke Abdullah Ocalan ser o vinderto ameyê eşkerakerdiş. Abdullah Ocalanî bale ante wa û birayîya Tirk û Kurdan ser o. Sewbîna zî vengda partîyanê muxalefet zî û wina vat: “Seba serkewtişê prosesî lazim o tu derûdorê sîyasî yê Tirkîya nêkewê hesabanê tengan û demkî, bi înîsîyatîf têbigêrê û bi hewayêko pozîtîf hemkarîye bikerê. Zemînê tewr muhîm yê nê hemkarîyan helbet Meclîs a.” Abdullah Ocalanî vat: “Ez seba eştişê gama pozîtîf a ke ma rê lazim a, amade ya. Seba Tirkîya û herême dem demê aştî, demokrasî û wa û bîrayîye yo.
Serekê DEVA, Gelecek Partî û Saadet Partî yê Amedî mesajê Rayberê PKK’yî Abdullah Ocalanî erjnayê.
Serekê DEVA Partî yê Aedî Remzî Kaymak dîyar kerd ke ê mesajanê Ocalanî rê negatîf nêewnîyenê. Kaymak wina dewam kerd: “Ma bawer kenê ke ma do no şer o ke çewres serrî yo dewam keno, bi wa û birayîye û aştî biqedînê. Nê semedî ra zî ma destî ra çi bêro ma do bikerê. No welat seba çaresernêkerdişê meseleyê Kurd zaf çî vîndî kerd. No mesele ganî êdî zemînêko qanûnî de cayê xo bigêro û bêro çareserkerdene. Û na babate de çi keweno milê kamî ser o ganî bikero.”
‘Ganî nêro taloqkerdene’
Serekê Gelecek Partî yê Amedî Aydin Aytaç zî wina vat: “Averşîyayîşê pozîtîf yê nê prosesî û çareserîya meseleyê Kurd seba ma mîyanê babetanê tewr muhîman de yê. Ocalan na babete de wayîrê înîsîyatîfî yo. Rêxistine ser o têsîrdar o û pozîsyonêko winasîn de yo ke eşkeno telîmat bido rêxistinî. Werrekna no mesele 2013 û 2015î de biqedîyayêne la heta ewro ame. Coka ganî no firsend baş bêro şuxulnayene.” Aytaçî ard ziwan ke tayî hêzî çareserîye nêwazenê û wina dewam kerd: “Hem hukmat, hem dewlet û hem zî Ocalan ganî îradeyêko zaf xurt nişan bidê. Beno ke provakasyon bibê. La ganê hemverê înan amadekarîyî bibê.”
Aytaçî dîyar kerd ke ganî no mesele nêro taloqkerdiş û wextê xo de bêro çareserkerdiş.
‘Ma do paştî bidê her gama ke do bêra eştiş’
Serekê Saadet Partî yê Amedî Abdurrahman Ergîn wina vat: “Polîtîkayanê înkar û asîmîlasyonî ra heta hemwelatîya têdûşt, zext û serdestîya ra heta heq û azadîyan, şîdet û şerî ra heta aştî û dîyalogî ma paştî danê her gama ke do bêra eştiş.”
Ergînî dîyar kerd ke ganî heq û azadîye nêbî cayê bazarî û vat: “Ganî merdim bi esasanê menfaatî nê, bi zerrîpakîye nêzdîyê meseleyî bibo.”
Ergîn dîyar kerd ke ganî sere de Meclîs û heme partîyê muxalîf, rêxistinê komelê sivîlî û her kes tewrê prosesê bibo û vat ke ê amade yê ke paştî bidê her gama ke do bêra eştiş.
