Serekê sazgehanê elewîyan qerarê îxlalî yê Mehkemaya Heqanê Merdiman a Ewropa yê derheqê Selahattîn Demîrtaşî erjna û wina vat: “Ganî bi lezûbez qerarê Mehkemaya Heqanê Merdiman a Ewropa bêro ca. Selahatîn Demîrtaş û girewteyê sîyasîyî bi lezûbez serbest veradîyê!”
Mehkemaya Heqanê Merdiman a Ewropa îtîrazê Tirkîya yê seba Hemserekê Pêroyî yê HDP’yî yo verên Selahattîn Demîrtaş newe ra bêro muhakemekerdene red kerd û bi nê qerarî îxlalê heqî yê vera Selahattîn Demîrtaşî teqez bi.
Qerarê DMME’yî ser o Serekê ABF’yî Mustafa Aslan, Serekê ADFE’yî Zeynel Abîdîn Koç û Hemserekê Pêroyî yê DAD’î Zeynel Kete PÎRHA rê qisey kerd.
‘Wa huqûq bêro caardene’
Serekê ABF’yî Mustafa Aslanî wina va: “Îqtîdar demo ke hesabê ci bêro, qeraranê DMME’yî ano ca la hesabê ci nêro qeraranê DMME’yî nêgêno verçiman zî. Ma pawenê ke bi lezûbez qerarê DMME’yî bêro caardene, Selahattîn Demîrtaş û girewteyê sîyasîyî serbest veradîyê. Tirkîya bi caardişê nê qerarî do zerrîpakîya xo nîşan bida.”
Serekê ADFE’yî Zeynel Abîdîn Koç zî dîyar kerd ke bicaardişê qerarê DMME’yî do nîşan bido ke Tirkîya de huqûq û heqê merdiman est ê û wina va: “Qerarê DMME’yî ganî bi lezûbez huqûqê zereyî de bêro caardene. No seba maxdûr û komelî zî avzel o. Ganî mekanîzmayê huqûqî bişuxulîyê ke Tirkîya de zemînê bawerîya heqî bêro awankerdene. Ma sey welatijê elewî bawer kenê ke taloqkerdişê azadîyan, îxlalkerdişê azadîyan o. No ser ma wazenê qerarê DMME’yî bêro caardene.”
‘Heme îxlalê heqanî yê’
Hemserekê Pêroyî yê DAD’î Zeynel Kete eşkera kerd ke goreyê sîstemê huqûqî yê Tirkîya, qerarê DMME’yî hîna şumûldar o û wina qedîna: “Tena seba Selahattîn Demîrtaşî nê, semedê kesanê ke hepisxane de manenê, seba înan zî heqê îxlalî yo. Ganî bi lezûbez qerarê Mahkemeya Heqanê Merdiman ê Ewropa bêro ca û Selahattîn Demîrtaş û girewteyê sîyasîyî bi lezûbez serbest veradîyê.”
