Komîsyonê Şar û Bawerîyan a DEM Partî, bi beşdarîya Hemserekanê Pêroyî yê DEM Partî Tulay Hatîmogullari û Tuncer Bakirhanî, munaqeşeyanê peyênan ser o sazgeh û komeleyanê Elewîyan reyde programêk viraşt.
Komîsyonê Şar û Bawerîyan a DEM Partî, bi beşdarîya Hemserekanê Pêroyî yê DEM Partî Tulay Hatîmogullar û Tuncer Bakirhanî, otelêk ke qezaya Çankaya ya Anqare de bi komel û sazgehanê Elewîyan reyde kom bîyî. Endam û temsîlkaranê sazgeh û komelanê Elewîyan tewrê programi bîyi. Destpêke de Cagira Hemserekanê Pêroyî yê DEM Partî yê berpirsîyara Şar û Bawerîyan Yuksel Mutlu qiseykerd û qala programî kerd.
Dima ra, Hemserekê Pêroyî yê DEM Partî Tuncer Bakirhanî qiseykerd û xêrameyîşê endam û temsîlkaranê sazgehanê Elewîyan kerd û nê çî vatê: “Ma ewro seba munaqeşeya babeta Elewîyan û fikaranê Elewîyan ser o ameyê têhet. Ma ge-ge bi sazgehanê Elewîyan reyde yenê têhet. Kombîyayîşê bi nê hawayî xeylî muhîm ê. Seba ma goşdarîkerdena rexne û fikaranê sazgehanê Elewîyan zaf muhîm ê. Ma Elewîyan reyde eynî dej cuya û pîya seba demokratîkbîyayîşê Tirkîya kede û bedelê gird dayê û pîya têkoşîn kerd. Ma tena seba sîyasetê rojane tîya nîyê eynî wextî de ma seba ameyoxî zî tîya de yê. Taybetî zî nê prosesî de ganî ma pîya bibê gird û têkalekê yewbînan de vinderê. No têhetameyîş seba ameyoxî, hêvîyê ma gird kena û rayîrê ma dîyar kena. Ma do heme bindestan reyde ameyoxî awan bikerê.”
‘No proses tena yê kurdan nîyo’
Tuncer Bakirhanî dîyar kerd ke prosesê Aştî û Komelê Demokratîk eke bireso netîceyî do heme şar serkewê û wina dewam kerd: “Resayîşê netîceyî yê prosesî, seyyewbênî, azadî û demokrasîye yo. Seba nê zî wa gumanê Elewîyan tîya de çinî bo. Nasnameyê kesêk nêro înkarkerdene û heme kes pîya seyyewbîn bicuyê. Eke Elewî azad bibê, kurd do azad bibê. Prosesê Aştîye tena prosesê kurdan nîyo. Prosesê ma pêrine yo. Heme şar û bawerî mîyanê nê prosesî de yê. Amanco esasî yê prosesî aştî û demokrasî yê. Elbet badê na merhaleye, gamê esasî yê huqûqî û demokrasîye yê. Heme bindestî wazenê bibê kerdoxê huqûqî. Wa heme kes û taybetî welatijê ma yê Elewî bizanê ke ma desture tena huqûq, demokrasî, seyyewbênî û azadîye rê danê. Eke çîyêk de Elewî razî nêbên, DEM Partî zî razî nêbena. Bizanê ke ma nasnameyê xo pawenê û masayî ser o ronişenê. Tîya re pey zî ma do wina dewam bikerê. Verê welatijanê Elewîyan zî ma nê soz danê. Aştîye wextê ke Elewî seyyewbîn bîyî, Cemxaneyî wayîrê statuyî bîyî, heme şar û bawerî wextê ke azad bîyî, aştî do bi ca bêro.”
‘Elewî do awankerdena ameyoxî de ca bigêrê’
Tuncer Bakirhanî îfade kerd ke badê qanûnê çarçewaye ê do derbazê merhaleya newe ya prosesî bibê û wina qisey kerd: “Merhaleya dîyine demokratîkkerdena komarî ya. Ma do têkoşînê nê bidê. Ma têkoşînê hemwelatijîya seyyewbînî û hempar danê. Ganî ma pîya têkoşîn bikerê. Entegrasyonê demokratîk ser o tayê munaqeşeyî yenê kerdene. Entegrasyonê demokratîk manaya ke Elewî bibê sûnî û kurd bibê Tirk nîyo. Eksê nê, heme bawerî û nasnameyê do bibê kerdox. Wazenê tayê munaqeşeyan bidê destpêkerdene. Sebebê nê zî wazenê Elewî û kurdan cîya bikerê. Ma têkoşînê rûmetî yê Elewîyan ra muteessîr bîyê û tîya ra pey zî ma do nê rayîrî ser o bê. Ma veng danê kesanê nê cîyakerdişî kenê ke dest nê çî ra veradê. Dejê verênî hema zî zerreyê ma de ganî yê. La ganî ma ameyoxê xo goreyê nê dejan dîyar nêkerê. Seba ke reyna o dej nêbêro cuyayene, ma do zemînêko demokratîk awan bikerê. Elbet ma dejê xo, xo vîrra nêkenê. Ma senîn xo vîr bikerê. La o nêbena sebeb ke ma prosesêko wina peygoş bikerê. Ma do verê xo bide ameyoxî ke siba ê dej reyna nêrê cuyayene, zemînêko pozîtîf awan bikerê. Elewî do awankerdena ameyoxî de ca bigêrê. Elewî eşkenê nê welatî demokratîk bikerê. Eke Tirkîya de Elewî, kurd û heme bindestî bibê wayîrê vatişî, o wext bena welatêko xurt.”
Peynîya qiseykerdena xo de Tuncer Bakirhanî va ke ê seba heme rexne û pêşniyaran rê akerde yê û bi wesîleyê nê progamî zî wazenê rexne û pêşniyaran goşdar bikerê.
‘Ma do partîyanê sîyasîyan zî zîyaret bikerê’
Badê Tuncer Bakirhanî, Serekê Pêroyî yê Federasyonê Elewîyanê Bektaşî Mustafa Aslanî zî seba programî spasîyê xo DEM Partî rê kerd û wina qisey kerd: “No program seba munaqeşeyanê peyênan ê gumananê komeleya Elewîyan ser o ameyo viraştene û ma do prosesî û nê munaqeşeyan ser o qisey bikerê. Tu kes nêeşkeno nameyê Elewîyan, kurdan û bawerîyanê nê welatî ser o qisey bikero. Ma do tena DEM Partî rêeyde nê, ameyoxî de, badê ke meclis abî, bi Serekê Meclisî û heme partîyê ke komanê înan parlamentoyî de est ê reyde pêvînayîş bikerê û prosesî ser omunaqeşeyan bikerê.”
Badê qiseykerdişan, kombîyayîş çapemenîye rê girewte dewam kerd.
