Kurtefîlmê dîrektora kurd Xecê Rêdûr ê bi nameyê “Zar û Zemar” ke fîlmo ewil ê dîrektorî yo û babeta heqanê merdiman ser o vindeno, di festîvalan de xelatî girewtî.
Kurtefîlmê nuştox û dîrektora kurd Xecê Rêdur a bi nameyê “Zar û Zemar” ke heqanê merdiman ser o vindeno, di festîvalan de xelatî girewtî. Ewil beşê “Heqanê Merdiman” ê Festîvala Kurtefîlman a Soeûl 2024 a Koreya Başûr de xelata sêmî girewt. Tewr peyên beşê şer ê Festîvala Mîyanneteweyî ya Fîlman a HECare 2025 a Kanada de sey fîlmo tewr baş ame weçînitene. “Zar û Zemar” rojhelatê Kurdîstanî de ameyo anten û produktorê kurtefîlmî Mihemed Bozan o.
‘Riyê kemaneyanê teknîkî ra ma nêeşkenê fîlmanê hîna serkewteyan biancê’
Dîrektora kurtefîlmî Xecê Rêdur ke hisê xo îfade kerdê, vat ke antişê “Zar û Zemanî” 2 serrî dewam kerdo. Xecê Rêdur da zanayene ke înan prosesê antişê fîlmî de xeylê zehmetî dîyê û vat: “Seba ke hetê kaykeran de îmkanê ma çîn bîyê, ma keye bi keye gêrayêne û ma xo rê kaykerî dîyêne. Reyna sînemakerîya kurdan hema zî nêbîya kom, ekîb û teknîkê ma aver nêşîyê, ma antişê fîlman de zaf zehmetîyan vînenê. O semedî ra seba komelê Kurdîstanî ma nêeşkenê fîlmanê hîna baş û serkewteyan virazê.”
‘Demo ke ez bi ziwanê xo karêk kena ez zaf keyfweş bena’
Xecê Rêdûr ard vîrî ke şarê kurdî hetê sîstem û îqtîdaranê dewletan ra polîtîkayanê çinkerdişî reyde rî bi rî maneno û dîyar kerd ke hema zî estbîyayîşê kurdan yeno înkarkerdene. Xecê Rêdûr îfade kerd ke nê sebeban ra demo ke ê bi ziwanê Kurdkî karêk kenê zaf keyfweş benê û wina vat: “Demo ke ez bi ziwanê, komelê xo, eslê xo, kulturê xo û heqanê xo bi rayîrê sînema mojnenê û dinya rê danê şinasnayene, ez gelekî şa bena. Seba ma çîyo tewr muhîm pawitişê erjanê kurdan o û ma do heta peynî zî nê esasî ser o bê.”
