Qamişlo – Festîvala Fîlman a Mîyanneteweyî ya Rojawanê Kurdîstanî ya 6. bi vîrardişê qurbananê Qirkerdişê Sînemaya Amûdê dest pêkerd.
Merkezê Kultur û Hunerî yê Mihemed Şêxoyî yê bajarê Qamişloyî de roja ewile bi vîrardişê domananê Qirkerdişê Sînemaya Amûdê, konserê Ma Musicî û mojnayîşê fîlmê “Hevalê Kekê Min” dest pêkerd.
Şaristanê Rojawanê Kurdîstanî Qamişlo raya şeşine mêmandarîya festîvala fîlman a mîyanneteweyîye keno. Festîvala Fîlman a Mîyanneteweyî ya Rojava ya 6. yena viraştiş. Festîval bi vîrardişê qurbananê Qirkerdişê Sînemaya Amûdê dest pêkerd. Emser zî festîval bi coşêko pîl û bi tewrbîyayîşêko zafe dest pêkerd. Şaristananê dorûverî û warê mîyanneteweyî ra zaf mêmanî tewrê festîvale bîyî.
‘Qurbanê Sînemaya Amûdî’
Çunke Sînemaya Amûdî seba şarê kurdî cayêko muhîm û vîrê komelî yo, uca de programê vîrardişî ame viraştiş. 13ê teşrîna peyêne ya 1960î de Sînemaya Amûdî de 283 domanan adirî de cuya xo vîndî kerdbî; coka destpêkê festîvale seba vîrardişî ame cîyakerdiş. Programê vîrardişî de seba qurbanan hurmet ame mojnayîş. Zaf sînemager, welatijî û mêmanê festîvale tewrê vîrardişî bîyî û qurbanî vîr ardî.
‘Fîlmê ‘Hevalê Kekê Min’’
Badê programê vîrardişî, saete 17.00 de Merkezê Kultur û Hunerî yê Mihemed Şêxoyî yê Qamişloyî de Koma Ma Music do bivejîyo sahne û dima zî fîlmê “Hevalê Kekê Min” do bêro mojnayîş. No fîlm fîlmanê dergan ra yew o û bi ziwanê kurdkî yo.
Programê dewlemend ê festîvale de ke do hetanî 20ê teşrîna peyêne dewam bikero, zaf fîlmê cîya-cîyayî do bêrê mojnayîş û programê cîya-cîyayî do bêrê viraştiş. Na çarçewe de 8 fîlmê belgeyî, 7 fîlmê kurguyî, 9 kilmfîlmê kurdkî, 9 kilmfîlmê mîyanneteweyî, 6 fîlmê hemparî yê teberê pêşbazîye û 5 fîlmê ke Rojawanê Kurdîstanî de ameyê viraştiş festîvale de ca gênê.

















