Qamişlo – Girê Moza ke nêzdîyê şaristanê Qamişloyî de yo, bi kûrîya xo ya tarîxî û bi qatanê medenîyetanê kehenan ê ke zerreyê xo de hewênayê, bale anceno muhimîya pawitişê tarîx û kulturê mintiqa ser.
Herêma Cizîrî ya Rojawanê Kurdîstanî ke mîyanê Mezopotamyaya Corêne de ca gêna, bi herrê xo yo berhemdar û çimeyanê xo yê awe, demanê verê tarîxê nuştekî ra nat seba cuye bîya merkezêko stratejîk. Mîyanê nê tabloyê dewlemendî de, Girê Moza sey yew girê arkeolojîk û kehenan ê mintiqa yê tewr muhîman ra vejîyeno ver.
Qatê medenîyetî û xoserîya cografya
Girê Moza ke dorûverê Qamişloyî de yo, çimeyanê mehelîyan de zî sey “Girê Moza” yeno namekerdiş. No girê kehen ê çandiş û roniştişî, sey zaf giranê bînan ê mintiqa, bi hezaran serran kavilanê medenîyetanê yewbînan ra dime ser o ameyo awankerdiş. Cigêrayoxî dîyar kenê ke binê nê girî de qatê demanê cîyayan ê tarîxî est ê; demanê Bronz û Asûrî ra bigîre hetanî demanê kehenan ê verê tarîxî.
Serran de derheqê muhimîya nê eserî de hetê sazgehanê pawitişê eseranê kehenan û cigêrayoxan ra zaf xebate, cigêrayîş û semînerê naskerdişî ameyî viraştiş. Nê xebatan reyna mojna ke Girê Moza tena parçeyêkê herrî nîyo; arşîvêko binerdkerde û parçeyêko muhîm ê vîrê tarîxî yê şaranê Mezopotamya yo.
Pisporî û pawitoxê kulturî bale anceno ser ke estbîyayîşê nê giranê tarîxîyan raştîyêka bingeyêne ancenê ver çiman: awanbîyayîş û tarîxê Qamişlo û dorûverê ey bi seserra 20. û bi awanbîyayîşê şaristanî sînordar nêbeno. Hemberê ci, na cografya wayîrê kûrîyêka hezaran serran a ke raste-rast medenîyetanê kehenan ê Mezopotamya ra girêdaye ya.
Seba ke no mîraso biqîymetin û erjê tarîxî yê şaranê mintiqa vînd nêbo, pawitişê nê giranê kehenî wayîrê muhimîyêka pîle yê.



















