Şubeyê ÎHD’yî yê Wanî derheqê hedîseyanê peyên ê dosyaya mergo biguman ê Rojîn Kabaîş de eşkerayîyêk daye û waşt heme dosyayê mergê cinîyan, bi taybetî dewaya Rojîn Kabaîş ser o bilez û hîna baş cigêrayîş bêro kerdene.
Şubeyê Komela Heqanê Merdiman (ÎHD) ya Wanî derheqê hedîseyanê peyên ê dosyaya mergo biguman ê wendekara Unîversîteya Yuzuncu Yilî ya Wanî Rojîn Kabaîş de awanîya xo ya qezaya Rêya Armûşî ya Wan de eşkerayîyêk daye. Hemserekê ÎHD’yî yê Wanî Ayten Kiran û Mehmet Salîh Coşkun û rayberê ÎHD’yî beşdarê eşkerayî bîyê.
Waştişê xo rêz kerdî
Metnê eşkerayî hetêhemserekan Şubeyê ÎHD’yî ya Wanî Ayten Kiran ra ame wendene.
Kiran dîyar kerd ke cinî Kurdîstan de rastê şîdeto neteweyî û cînsîyetî yenê û da zanayene ke herinda eşkerakerdişê sebebanê rastîn ê babeta cinîyan, mekanîzmayê dewlete û ATK’yî raporê ke xizmetê pawitişê sucdaran kenê, virazenê, keyeyan bêçare verdanê ke bi serran paweyê edaletî bimanê.
Kiran vengda Wezaretê Edaletî, ATK, Komîsyonê Heqanê Merdiman ê Meclîsî, Baro, Merkezê Heqanê Cinîyan û heme rêxistinanê sîvîl û waştişê xo wina rêz kerdê:
“* Ganî heme dosyayê mergê cinîyan, bi taybetî dosyaya Rojîn Kabaîş ser o, bilez û hîna hîra cigêrayîş bêro kerdene.
* Ganî Sazgehê Tibê Edlî wezîfeyê xo yo sey yewin rayedarîya belgekerdişê şîdetî, kiştişê cinîyan û îşkenceyî ra bêra vetene û ganî telîmatnameyê qanûnî bêrê ronayene seba ke raporê doktor û nêweşxaneyanê xoser goreyê qeraranê Mehkemaya Heqanê Merdiman a Ewropayî sey delîl bêrê qebulkerdene.
* Ganî Peymana Stenbolî newe ra bêra îmzakerdene û heqê cinîyan ê pawitişî û heyatî bêrê garantîkerdene.
* Ganî polîtîkayê bêcezatî biqedîyê û kiştişê cinîyan çarçewaya berpirsîyarîya sucdar û dewlete de biasîyê.
* ÎHD do têkoşînê cinîyan ê seba heqanê heyatî bidomno û waştişê edaletêko heqdar, şeffaf û tesîrdar vera kerdişanê dişmenî yê hemverê cinîyan ê dewşete, ATK û mekanîzmayanê edaletî berzêr bikera.”
Wendişê metnê hemparî ra pey eşkerayî qedîyaye.
