Îdarekerdoxê ÎMO’yî Ayetullah Keskînî vat bajarê ke rîskê erdlerzê mîyanên û pîlî de yê, hazirîyê ci çin ê. Çewlîg herêma rîskê erdlerzî de ca gêno labelê hazirîyêka tesîrdare çin a. Awanîyê xirabî cayê xo de yê, her roje newe îmarî abenê, talanê ekolojîk rîskî zêde keno.
Erdlerzê 2023î ra di serrî û nêm vîyartî. Gelek bajaran de xebatanê teknîkî dest pêkerd labelê Çewlîg ke dereceya yewine ya erdlerzî de yo û xeta fayî ya tewr aktîfe ser o yo, hazirîyê ci çin o. Merkezê bajarî de awanîyê kehenî û bi hezaran awanîyê xirabî yê tesbîtkerdeyî cayê xo de yê.
Ayetullah Keskînî vat Çewlîg de xetê fayî yê Anatolyaya Vakur û Rojhelatî resenê pê, îhtîmalê erdlerzê mîyanên û pîlî zaf berz o. “Labelê şaristanê ma tam hazir nîyo.”
Keskînî vat badê erdlerzê Çewlîgî yê 2003î tay awanîyê dewlete xurt bîyî labelê zafê awanîyan kehen ê. Taxa Kultur û Uydukentî de awanîyê muhendîsîye est ê labelê Taxa Saray, Herêma Temel Yapi û Kuçeyê Madenî de newekerdiş apey mendo.
keyeyê ke TOKÎ viraştî zî goreyê qewetê şarî zaf vay ê. Keskînî vat: “4825 keyeyî tesbît bîyî ke xirb ê. 1000 keyeyî ‘Cayê xo de Vurîyayîş’ reyde newe bîyî labelê sewbîna gamêk nêerzîyaye.”
Keskînî vat projeyê maden, HES û GES’î zemînî xirab kenê, rîskê herikîyayîşê herre û hêzazan zêde kenê. “Raporê ÇED’î formalîte bîyî. Kontrolêko pêt û beşdarîya şarî lazim a.”
Peynî de Keskînî vat: “Gelek çîyî ganî bêrê kerdene labelê erey nîyo. Îdareyê afetan o bikoordîne, şefaf û zanistî rîskî kêmî keno. Eslê xo de hazirî tena awanîyanê neweyan reyde nêbena, hişmendîya şarî zî lazim o.”
