Federasyonê Xazîyanê Vakur û Rojhelatê Sûrîye bi munasebetê serrgêra Komployo Mîyanneteweyî yê vera Rayberê Şarê Kurdî Abdullah Ocalan beyanatêk vila kerd û va: “Ma bi hêrsêko girs no komplo şermizar kenê ke vera heme şaranê azadîwazan ame kerdene.”
Federasyonê Xazîyanê Vakur û Rojhelatê Sûrîye bi munasebetê serrgêra “Komployo Mîyanneteweyî” yê ke 9ê Citmenga 1998î de vera Rayberê Şarê Kurdî Abdullah Ocalan dest pêkerd beyanatêko nuştekî vila kerd.
Beyanatî de ame îfadekerdene ke prosesê 9ê Citmenge tena vera Rayberê Şarê Kurdî Abdullah Ocalan ney, komployo ke vera “heme şaranê azadîwazan” bî. Federasyonê Xazîyan va komployê 9ê Citmenga 1998î bi hêrsêko girs ma şermizar kenê û Rayberîya xo bi hurmet silam kenê.
Komployo tarîxî
Qewetanê hegemonîkan destpêkê seserra 21. de waşt Rojhelatê Mîyanênî goreyê feydayanê xo reyna awan bikerê. Rayberê Şarê Kurdî Abdullah Ocalan û Têgêrayîşê Azadîye sey astengo tewr girs ame dîyayene. 15ê sibate 1999î de Rayberê Şarê Kurdî Abdullah Ocalan dewleta tirke rê ame teslîmkerdene. Labelê Rayberîya ma bi xoverdayîşê xo raştîyêka girse eşkera kerd: komelê exlaqî-sîyasî, paradîgmaya ekolojîk-demokratîke û azadîya cinîyan pêşkêş kerd.
Vengdayîşê beşdarîye
Federasyonê Xazîyan: “Bi heyecan beşdarê Prosesê Haştîye û Komelê Demokratîkî bibê.”
Beyanat wina qedîya: “Ma sey xazîyan soz danê ke ma do vîrameyîşê şehîdan bipawê, azadîya Rayberîya xo fîzîkîye temîn bikerê û berpirsîyaranê komployî ra hesab bipersê.”
