Goreyê rojnameyanê erebî, sinasnayîşê dewleta Filîstînî hetê hêzanê mîyanneteweyî ra, vurîyayîşêko sembolîk û muhîm o. La eke yewhelwestîya filîstînîjan a zelal û stratejîke ca nêro, no do bes nêkero.
Zafê rojnameyanê erebî hûmaranê xo yê ewroyî de babeta sinasnayîşê dewleta Filîstînî ser o vindertî.
Rojnameyê El Erebî yew meqaleyê xo yo ke bi sernameyê “Filîstîn mabênê sinasnayîşê sembolîkî û rewşa tale de ya” de, usûlê nêzdîbîyayîşê dewaya Filîstînî rexne kerd. Meqale de yeno vatene ke sinasnayîşê dewleta Filîstînî yê demê peyênî, sewîyeya destkewteyanê sembolîkan nêvîyarenê û goreyê vurîyayîşanê bingeyênan ê sewîyeya sîyasî û meydanî de niyê.
Rojnameyî dîyar kerd ke tay welatê rojawanî nîşana paştîdayîşê dewaya Filîstînî berz kenê, la raştîye de bê ke qet yew game bierze, têkilîyanê xo bi Îsraîlî ra pawenê û wina nuşt: “Ne eleqeyanê xo birnenê ne zî pêameyîşê ke est ê, newe ra çim ver ra derbas kenê.”
Nuştoxê meqaleyî hişyarî da û vat gereke zaf bawerîya xo bi înan nêarê û wina dewam kerd: “Dewletî bi eşkerayîyan nêvirazîyenê. Labelê bi xoverdayîş û yewîya sîyasî virazîyenê. Rewşa Qudsî û heqa agêrayîşî, do se bi înan bêro? Tehluke pîl o; dewletêka ke serwerîya xo kême ya, do bîya.”
Yew meqaleyê bînî yê eynî rojnameyî de bi sernameyê “Ewropa Filîstînî nas kena: Qîrayîşo vera Netanyahu û yew name seba Trampî” de, yeno vatene ke helwesta Ewropa ya sinasnayîşê dewleta Filîstînî do erdî ser o hemsengîyan de qet yew vurîyayîş nêkero û wina dewam kerd: “La dêsê bêvengîya mîyanneteweyî de yew xala kême ya. Eynî wext de yew mesajê sîyasî yo.”
Rojnameyê El Şerq El Ewsatî zî derheqê babete de meqaleyêko bi sernameyê “Sinasnayîşê dewleta Filîstînî ser o” weşana. Meqale de ame vatene ke zêdebîyayîşê sinasnayîşê dewleta Filîstînî hetê mîyanneteweyî ra, tevî ke dereng mendeyo û seba vurîyayîşê rewşa mewcûde bes nîyo zî, la serkewtişêko lazim o. Dewamê meqaleyî de ame îşaretkerdene ke seba ke no sinasnayîş helwesta mîyanneteweyî de vurîyayîşêk o û zexto zêde vera Îsraîlî yo, gereke bi cîdîyet eleqe pê bêro ronayene ke dewaya Filîstînî hîna aver şêro.
Rojnameyî de meqaleyêko bîn bi sernameyê “Sinasnayîşê dewleta Filîstînî de yew wendiş” vejîya. Rojnameyî bale ante ser vurîyayîşê raya pêroyî ya welatanê rojawanî û zêdebîyayîşê sinasnayîşê dewleta Filîstînî ser û dîyar kerd ke no yew fersendêko erjaye yo. Nuşte de herîna ame vatene ke gereke Filîstînîjî bi yewrêzîya xo û ardîşê ca yê stratejîyêka zelale û goreyê serdemî nêzdîyê nê helwestî bibê. Peyînîya meqaleyî de ame vatene ke cayê ke nê fersendî bi nakokîyanê xo yê zereyî vîndî bikerê, gereke nê fersendî dest bivisnê. Çimkî dinya nika goşdarî kena û goge meydanê Filîstînîjan de ya.
