Dezgehê elewîyan ke Bern de ameyî têhet vera vengdayîşê Rayberê Şarê Kurdî Abdullah Ocalan, vat: ”Ma sey şarê elewîyan prosesê aştîye de do rolo aktîf bîgirê xo ser. Semedê xizmetê aştîye, semedê heqî, şarî û riza ma do têkoşînê xo xurtêr bikerê.”
Paytextê Swîsre Bern de dezgehê elewîyan, pabesteyê Yewîya Hêzê Demokratîkî ya Ewropa (ADGB) û xeylê sîyasetmedaran bi şîarê ”Ma kerdoxo ronayox ê aştîye û bedilnayîşê demokratîkî yê” eşkerayîya çapemenîye kerde.
Eşkerayîya ke meydanê îstasyonê trenan de ameye dayene pabesteyê FEDA, DAKB, ADGB’yî xeylê sîyasetmedarî tewrê ci bîyî. Eşkerayîye bi kurdkî, tirkî û almankî ameye wendene.
Dezgehanê elewîyan reyna vera cehdkerdişê çimeyanê Munzurî de viraştişê mescîtî nêrazîbîyayîş mojna û va gerek dewlete polîtîkayanê xo yê asîmîlasyonî caverdo.
Eşkerayîya bi nameyê FEDA û DAKB’yî de bale ameye antene vengdayîşanê aştîye yê Rayberê Şarê Kurdî Abdullah Ocalan ser ke bi serran o keno û ame vatene ke komîsyonê meclîsî firsetêko muhîm o. Eşkerayîye de ame vatene ke aştîye têna mutabakatê mabênê hetan nîyo, bi rizaya hemparê ya şaran û bawerîyan mumkun a.
Dezgehanê elewîyan waştişê sey hemwelatîya seyyewbînîye, statuyê cemxaneyan, betalkerdişê dîyanetî, wedaritişê dersanê dînî yê bizorî, perwerdeyê bi ziwanê dayîke, eşkerakerdişê arşîvanê qirkerdişan, qedînayîşê polîtîkayanê qeyûmî û pawitişê xoza û waranê bimbarekan ardî ziwan.
Dezgehanê elewîyan va: ”Komelê elewîyan şaranê ronayoxan ê nê welat ra yew o. Ma heqê xo yê hemwelatîya seyyewbînîye canêverdenê. Eke ma elewî komîsyonê aştîye de ca megirê aştîye kêm manena û komelo demokratîk kêm meneno. Ma sey şarê elewîyan prosesê aştîye de do rolo aktîf bîgirê xo ser. Semedê xizmetê aştîye, semedê heqî, semedê şarî û semedê riza ma do têkoşînê xo xurtêr bikerê.”
