Rêxistinanê heq û huqûqî seba heqê hêvî yê Rayberê Şarê Kurdî Abdullah Ocalan, Emîn Gurban, Hayatî Kaytan û Civan Boltanî muracatê Komîteya Wezaretê AK’î kerd. Rêxistinan waşt ke wa qerarê AÎHM’î bêrê caardiş.
OHD, ÇHD, ÎHD, TÎHV, TOHAV, CÎSST, Baroyê Amed, Wan, Colêmerg, Riha û Şirnexî seba heqê hêvî yê Rayberê Şarê Kurdî Abdullah Ocalan, Emîn Gurban, Hayatî Kaytan û Civan Boltanî rê muracatê Komîteya Wezaretê AK’î kerd.
Verê cû AÎHM, heqê Rayberê Şarê Kurdî Abdullah Ocalan, Emîn Gurban, Cîvan Boltan û Hayatî Kaytanî de qerarê îxlalê heqî dabi. Nê 4. na ke rêxistinê heq û huquqî muracaatê Komîteya Wezaretê AK’î kenê.
Qerarê AÎHM’î nêanê ca
Muracat de ame vatene ke qet qerarê AÎHM’î nêanê ca. Muracat de wina ame vatiş: “Hadrekerdene belgeyê stratejî bi qiymet ê la zereyê belgeyî nêdekenê. Hukmat qet verê raya pêroyî rê takvîmêk nêroneno. Serekê MHP’yî Devlet Bahçelî bi eşkera vatbi ke wa heqê hêvî yê Abdullah Ocalanî bêro caardene. Vatişê Yilmaz Tunçî dîyar keno ke hukmat vatişanê xo nêano ca.”
Muracat de nê waştişan ardî ziwan:
“-Komîte wazena ke dewayanê Ocalan (2), Gurban, Kaytan û Boltan – Tirkîya bi hawayêko bitesîr teqîb bikero û na grûbe bêro girewtiş rojeve kombîyayîşanê heqanê merdiman ê mutadî yê Komite; çim ver de vindarno ke no het ra qeraro verên Adarê 2014î de ameyo dayîş, muracatkerdoxî bi desan serran o hepisxane de yenê tepiştiş, heqê înan ê hêvî destê înan ra ameyo girewtiş û bi seyan hepsîyê bînî zî binê tesîrê nê rejimê ceza yê de manenê.
-Goreyê prensîpanê ke qeraranê Dadgeha Heqê Merdiman a Ewropa (AÎHM) de ameyê dîyar kerdiş ke tedbîrê pêroyî bêrê girewtiş ke nê huqûqê Tirkîya de seba tayê sûcan bêcîyakerdişî, hukmê serê qedexekerdişê veradayîşê bişertî yê kategorîkî wedarîyê û qanûnê ke çimeyê nê îxlalî yê, bêrê vurîyayîş.
-Hetê Serekê Komîteya Wezaretan ya zî Sekreterê Pêroyî ra, çarçeweya ‘Prensîbê Demokrasî yê Reykjavîkî’ de, bi meqsedê xurtkerdişê dîyalogê sîyasîyî yê bi muhatabanê neteweyîyan ê eleqedaran reyde yê derheqê tatbîqkerdişê qeraran de, Hukmatê Komara Tirkîya rê yew agahdarî bêro erşawitiş.
-Komîte, Hukmatê Komara Tirkîya ra wazena ke seba pêro grûba dewayan malumatê îstatîstîkî bido ke nê malumatî zî nînan xo de bigîrê: ‘Welat de çend kesan ceza muebbeda girankerde girewta, goreyê serran çend kesan na ceza girewta, ceza eleqedare kamcîn serran de bîya qet’î, kesê ke ceza muebbeda girankerde girewta, dezgehanê înfazê ceza de çend serrî tepişte mendê.”
