Mayanê ke domanê xo şer de vînî kerdî, dîyar kerdî ke vengdayîşê bi dîmenî yê Abdullah Ocalanî moral dayo înan û vatî: “Ma Rayberê xo ra bawer kenî, ma pey vengdayîşê ey de yî. Ma amade yî ke çi ke destê ma ra bêro ma do bikerî.”
Rayberê Şarê Kurdî Abdullah Ocalan ewro çarçewaya “Prosesê Aştî û Komelê Demokratîkî” de vengdayîşê bînî yê tarîxî kerd. Vengdayîşê bi dîmenî de Hepsîyê Berze ya Tîpa F ya Îmralî zî hetê Abdullah Ocalanî de ca girewtî.
Mayanê Aştî yê Hezexî ke domanê xo dema şerî de vînî kerdî, dima 26 serran vengdayîşê bi dîmenî yê Abdullah Ocalanî temaşe kerdî û vengê ey hesîyayî. Mayan hîsanê xo yê demê temaşekerdişê dîmenî de û waştişê xo MA’yî rê ardî ziwan.
Saetekî benda dîmenî menda
Maya Aşîtî Halîme Ete (50) ke lajê xo Rezan Ete hêrişanê DAIŞ’î yê serê Kobanî de vînî kerda, dîyar kerd ke dima ke xebera ke dîmen do bêrî parekerdiş, a saetekî verê televîzyonî de menda û wina va: “Wexto ke mi xeber hesîya, ez zaf keyfweş bîya û ez verê televîzyonî de menda. Wexto ke dîmenî ameyî mojnayene ez zaf keyfweş bîya. Dîmenan moral da mi. Ma Rayberê xo ra bawer kenî. Ma heta peynî ey ra bawer î. Heta ke ma canê ma bibo, ma do hetê ey de bîbî. Hêvîyê ma yê girdî est î.”
Halîme Ete ya ke dîmenî keyfweş bîya eşkera kerd ke sey mayan, ê amade yê ke prosesî de rolanê xo kay bikerî û va ke ê do pey ra gam nêerzî û wina domna: “Ma heta peynî serê sozê Rayberî de yî.”
‘Wa aşîtîyêka bi rûmet biba”
Maya Aşîtî Ferîde Margaz (62) ke lajê xo Kamîl Margaz 8 serrî verê cû şer de vînî kerda, va ke wexto ke aye dîmen dîya, aye heman wextî de zaf hîsyar bîya û wina va: “Ez hem keyweş bîya, hem zî xemgîn bîya. Wa aşîtîyêka bi rûmet biba. Seba naye, ganî Rayberê ma hetê ma de bo. No dîmeno ke no prosesî de ame weşanayene, hêvîya ma kerd pîl.”
“Kelecanî ra ez girîya”
Nebîha Akay (64) ke şer de di birayanê xo, Celal û Mehmet Ata Acar, vînî kerda, dîyar kerd ke hesîyayîşê vengê Rayberê Şarê Kurdî Abdullah Ocalanî û bi dîmen dîyayîşê ey dima 26 serran ey kelecanî kerda û wina domna: “Dima na heyecanî ez girîya. Ewro, dima yew demêko derg mi nê ramanî, hîs kerdî. Ma wazenî Rayberê xo yew demêko nezîk de serê sûrê Amedî de bîvînî. O 26 serrî yo tecrîd de yo, mîyanê çar dîwaran de yo. Ne keyeyê ey ne zî avûkatanê ey, ey nêdîbî. Yew merdimêko normal nêeşkeno 26 rojan xo ver bido, la Rayber bi ramananê xo 26 serran ciwan mend.”
“Kurdan bi hemeyê dinya ra da nasnayêne”
Maya Aşîtî Kumrî Babat ke bi serran o mîyanê Mayanê Aşîtî de ya, wina va: “Ma vengê Rayberî ra zaf keyfweş bîyî. Sey Mayanê Aşîtî, ma nêwazenî ke domanê kesî bimirî. Ma aşîtî û seyyewbînanî wazenî. No vengê Rayberî ne tena seba kurdan, do seba her kesî aşîtî bîyaro. No veng do şeran biqedîno. Rayber zaf gamî eştî la dewlete nêeştî. Ganî dewlete gamekê ber bi aşîtîye bierzo. Ma bi serran o şer de yî. Ciwanî mirenî, zîndanî pîya ciwanan ê. Dora dewlete ya ke gamek ber bi aşîtîye bierzo.”
