Avukata Rifat Ronîyî ke Hemserekê MED-DER’î yo veren o û girewte yo, Cemîle Turhali da zanayîş û veng da ke wa şar dewaya ey rê wayîr vejîyo û va “Na dewa yê her kesî ya.”
Dadgehîya Komare ya Pêroyî yê Dîyarbekirî, 24ê êlule de pê îfadeyê Umît Akbiyikê îtîrafkerdoxî komxebate kerdbî û eştbî MED-DER, Payîz Pirtûk û Kooperatîfê Perwerdeyê Ziwan û Hunerî yê Anka ser o. 30 kesî ke zafê înan mamostayê kurdkî bî, amebî tepiştiş, zaf kitabî û malzemeyê dîjîtalî zî amebî girewtiş. 29 kesî ame verdayîş la Rifat Ronîyo ke Mamostayê Kurdkî û Hemserekê MED-DER’î yo verên o, bi îdîaya ke ‘endamê rêxistin o’ ame tewqîfkerdiş.
‘Tacîzê huqûqî yo’
Parêzera Ronîyî Cemîle Turhali va ke na dewa, yew tacîzê huqûqî yo ke yeno kurdkî ser. Aye va ke polisê dewlete zî MED-DER ra dersê kurdkî girewtê û belgeyê înan est ê la çi heyf ke nika sîyaset vurîyayo û xebatê kurdkî benê terorîze.
‘Ganî beraat bêro dayîş’
Turhalî va ke goreyê qanûnanê AÎHM’î û yê Dadgeha Pêroyî ra ganî beraat bêro dayîş û aye veng da heme şarî ke wa dewaya Ronîyî rê wayîr vejîyê. Dewa do roja 17ê kanûne de Dadgeha Cezaya Girane ya 5. yê Dîyarbekir de bêra dîyayîş.”
