Îdrîs Balukenî ard ziwan ke Kongreya 12. ya PKK’yî gama verêne nîya, hetê kurdan gamê zaf muhîmî eştî û vat ewro ra tepîya gerek dewlete û hukmatî game bierzê.
Îdrîs Balukeno ke prosesê 2013-2015î de endamê Heyetê Îmraliyî bi derheqê rojdemî de ANF’yî rê qisey kerd.
Balukenî nê rojî sey rojê tarxîyî name kerdî û nê vatî: “Kongreya PKK’yî gama verêne nîya, rayîro ke xeylê wexto ke yeno rayraşîyayene de ver bi menzîlê belka gama peyên a. Têgêrayîşê kurdan û Birêz Ocalanî prosesê 92-93yî ra nata cehd kenê ke têkoşînê çekdarî biaçarnê têkoşînê sîyasîyî. Xora nê demî de ge-ge prosesê dîyalogî bîyî. Prosesê çareserîye yê prosesê 2013-2015î bado ke masa ameye qeldeyan zî tewirê Birêz Ocalanî zelal bî. Dewlete û hukmatî planê çokdayîşî yo gird fîna dewre û dî ke nêeşkenê şarê kurdî û waştişê ci yê azadîye tesfîye bikerê. Coka înan gerarê xo bedilna.
Ewro hinî gerek gamê ke bêrê eştene est ê. Yanî gerek wird hetî ver yewbînan pîya gaman bierzê. Xora nê gamî vengdayîşê Haştîye û Komelê Demokratîkî yê 27ê sibate de amebî vatene. Yanî gerek gamê huqûqî û sîyasîyî bêrê eştene. Xora haştîye têna caverdayîşê çekan nîyo, ronayîşê ameyoxê bianor û demokratîkî yo. Coka gerek hinî meseleya kurdan bêra çareserkerdene, gerek heqê kurdan ê bingeyînî bêrê dayene. Gerek hinî meclîs înîsîyatîf bigîro û xebate bido destpêkerdene. Eynî wextî de gerek zemînê komelkî û sosyalî zî bêro holkerdene.
Sere de heqê hêvî gerek cade şertê Birêz Ocalanî bêrê bedilnayene û bedilnayîşê qanûnî bêrê kerdene. Prosesê verê ma de averşîyayîşê pozîtîfî gerek bêrê ciwîyayene. No qerarê bedilyayîşê stratejîk o. Hemleyêka newî ya bedilyayîşê demokratîkî ya. Şarê kurdî no pawitişê çekdar semedê pawitişê estbîyayîşê xo, ziwan, nasname û kulturê xo rayra berdêne. Nika yeno vînayene ke hinî nê heqê kurdan ameyî qebulkerdene . Coka hinî wextê ci yo ke şarê kurdî bi metodanê neweyan wayîrê estbîyayîşê xo bivejo.”
